«Azamattarǵa arnalǵan úkimet» jyljymaıtyn múlikke qatysty qyzmetter kórsetýdi ýaqytsha toqtatady
ASTANA. QazAqparat – «Jyljymaıtyn múliktiń biryńǵaı memlekettik kadastry» jańa aqparat júıesine kóshýine baılanysty jyljymaıtyn múlik jelisi boıynsha qyzmetter kórsetýge ótinimdi qabyldaý ýaqytsha toqtatylady. Bul týraly «Azamattarǵa arnalǵan úkimet» memlekettik korporatsııasynan málim etti, dep habarlaıdy QazAqparat tilshisi.
«Memlekettik korporatsııa 2023 jylǵy 26 sáýir men 9 mamyr aralyǵynda elimizdiń HQKO-larynda jyljymaıtyn múlikke quqyqtardy (aýyrtpalyqtardy) memlekettik tirkeý, mindetti tirkeýge jatpaıtyn jyljymaly múlikti tirkeý jáne jyljymaıtyn múlik obektilerin tehnıkalyq tekserý salasynda qyzmetterdiń barlyq túrlerin kórsetpeıtinin habarlaıdy. Qaǵaz jetkizgishterde qyzmettiń oryndalýy, ári qujattardy jetkizý merziminiń uzaqtyǵyna baılanysty HQKO-larda kórsetiletin qyzmetterdi qabyldaý eGov.kz-ten buryn toqtatylady», - delingen korporatsııa aqparatynda.
Degenmen, qyzmetke 26 sáýirge deıin tapsyrys bergen azamattar nátıjeni kórsetilgen merzimde ala alady. Sonymen qatar bıyl 2-9 mamyr aralyǵynda eGov.kz portaly arqyly jyljymaıtyn múlikti resimdeýge ári tehnıkalyq tekserýge qujattardy onlaın qabyldaý, notarıýstar, salyq júıeleri arqyly, ekinshi deńgeıdegi bankter jáne QR Ádilet mınıstrliginiń atqarýshy organdarynyń júıeleri boıynsha qabyldaý toqtatylady. Odan bólek, kórsetilgen kezeńde azamattar turǵyn úı baǵdarlamalaryna baılanysty qyzmetterdi paıdalana almaıdy.
«Jańa júıege kóshý mereke kúnderi uıymdastyrylady. Aıta keteıik, JMBMK-ǵa kóshý kezinde jer ýchaskelerin resimdeýge baılanysty barlyq ómirlik jaǵdaı kezeń-kezeńimen tsıfrlanady. Odan bólek, memlekettik qyzmetterdiń barlyq spektrin kórsetý, onyń ishinde jańa jáne qoldanystaǵy ýchaskeler boıynsha túzetý engizý múmkindigi kózdelgen. Sondaı-aq, sybaılas jemqorlyq qaýpine jol bermeý maqsatynda jer ýchaskeleri men jyljymaıtyn múlikti resimdeýi zańnama turǵyda qarastyrylatyn bolady», - dedi memlekettik korporatsııanyń basqarma tóraǵasy Súıenish Ábdildın.
Eske sala keteıik, 2023 jyldyń 5 sáýirinde «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zańǵa qol qoıyldy. Memlekettik korporatsııa jer qatynastary salasynda memlekettik qyzmetti kórsetýdi avtomattandyrý maqsatynda «jyljymaıtyn múliktiń biryńǵaı memlekettik kadastry» aqparat júıesin iske qosý júrip jatyr. Aqparat júıesi eki derekqordan alynǵan málimetterdi qamtıdy. Olar: «Jyljymaıtyn múlik tirkelimi» memlekettik derekqory jáne Memlekettik jer kadastrynyń avtomattandyrylǵan aqparattyq júıesi. Derekter bazasynan barlyq aqparatty kóshirý aıaqtalǵannan keıin olar joıylady.
