«Azamattarǵa arnalǵan úkimet» ókilderi Rashıd Amanjolovqa qatysty túsinikteme berdi
ASTANA. QazAqparat - «Azamattarǵa arnalǵan úkimet» memlekettik korporatsııasy Rashıd Amanjolovtyń tutqynǵa alynýyna qatysty jaǵdaıǵa túsinikteme berdi, dep habarlaıdy «QazAqparat» HAA.
«2017 jyldyń 27 sáýiri kúni elimizdiń birqatar aqparat quraldarynda «Azamattarǵa arnalǵan úkimet» memlekettik korporatsııasy baqarma tóraǵasynyń orynbasary Rashıd Amanjolovtyń tutqynǵa alynǵany jóninde aqparat tarady. Amanjolov Rashıd Májıtuly rasynda da 2017 jyldyń 26 qańtary kúni «Azamattarǵa arnalǵan úkimet» memlekettik korporatsııasy basqarma tóraǵasynyń orynbasary qyzmetine taǵaıyndalǵan bolatyn. Alaıda, ol 20 sáýirden bastap, eńbek kelisimin óz erkimen buza otyryp, memlekettik korporatsııadaǵy jumysyn toqtatqan bolatyn»,-delingen baspasóz qyzmetiniń habarlamasynda.
Aqparatta qazirgi tańda «Azamattarǵa arnalǵan úkimet» ókilderi memlekettik korporatsııanyń burynǵy qyzmetkeriniń tutqynǵa alynýynyń sebep-saldarlary týraly málimetterden beıhabar ekendigi aıtylady. Sonymen qatar «Azamattarǵa arnalǵan úkimet» memlekettik korporatsııasyna quqyq qorǵaý organdarynan eshqandaı suraý salynbaǵandyǵy aıtylady.
Aıta keetıik, Rashıd Amanjolovtyń qamaýǵa alynǵany týraly Astana qalalyq sotynan habarlandy.
«Astana qalasynyń Esil aýdandyq №2 soty 22 sáýir kúni Amanjolov Rashıd Májıtulyn eki aı merzimge qamaýǵa alý týraly shara qoldandy»,-delingen habarlamada.
