«Azamattarǵa arnalǵan úkimet» memlekettik korporatsııasynyń qyzmetkerleri senbilik ótkizdi
ASTANA. QazAqparat - «Azamattarǵa arnalǵan úkimet» memlekettik korporatsııasynyń qyzmetkerleri elimizdiń barlyq oblystyq ortalyqtarynda jáne qalalarynda senbilikke shyqty. Qalalardy tazartý men kógaldandyrýǵa memlekettik korporatsııanyń 3 966 qyzmetkeri qatysty.
«Biz jańa quramda jalpy qalalyq senbilikke alǵash ret qatysyp otyrmyz, - dedi «Azamattarǵa arnalǵan úkimet» memlekettik korporatsııasy» KE AQ fılıaly - «JMO» dırektsııasynyń dırektory Bahyt Ábishev. - Búgin biz oblystyq ortalyqtardyń aýmaqtaryn tazartýǵa jáne aǵashtar otyrǵyzýǵa qatysyp qana qoımaı, sondaı-aq buryn jeke-jeke jumys jasaǵan tórt uıymnyń ujymyn biriktirdik. Bizdiń Respýblıkamyzdyń astanasynda otyrǵyzylǵan 100 aǵash «100 qadam» baǵdarlamasynyń oryndalýyn bildiredi, atap aıtsaq, júzinshi qadam - «Azamattarǵa arnalǵan úkimet» memlekettik korporatsııasynyń qurylǵandyǵy».
Senbilik barysynda memlekettik korporatsııanyń qyzmetkerleri kóshelerdi, týǵan qalalarynyń baqtary men saıajaılaryn tazartyp, 2 395 kóshet otyrǵyzdy, qorshaý men bordıýrlerdi aqtady. Búgin barlyǵy da: ınspektorlar, zańgerler, ekonomıster jáne departamentterdiń dırektorlary teń deńgeıde jumys jasady. Óz qalasynyń taza bolýyna árqaısysy da úles qosqysy keldi. Al astanalyq fılıaldyń qyzmetkerleri tipti Esil ózeniniń jaǵalaýynda birlesken fleshmob jasady.
«Búgin Memlekettik korporatsııanyń aýqymyn alǵash ret sezindim», - dedi Muqajanova Tolqyn, «Halyqqa qyzmet kórsetý ortalyǵy» dırektsııasynyń qyzmetkeri. - Árıne, men birikkennen keıin shtat qyzmetkerleriniń sany kóbeıgenin 20 myń adam bolǵanyn estidim, alaıda dál osylaı bolady dep kútpegen edim. Búgin aldaǵy bolashaqta orasan zor jumys atqarǵaly turǵan ózimizdiń jańa áriptesterimizben betpe-bet tanysý múmkindigi boldy».
«Jer kadastry ǵylymı-óndiristik-ortalyǵy» RMK, «Jyljymaıtyn múlik ortalyǵy» RMK, «Zeınetaqy tóleý jónindegi memlekettik ortalyǵy» RMQK jáne «Halyqqa qyzmet kórsetý ortalyǵy» RMK-lardy qaıta uıymdastyrý jolymen qurylǵan «Azamattarǵa arnalǵan úkimet» memlekettik korporatsııasy 2016 jylǵy 11 sáýirde óz qyzmetin bastap ketkendigin eske salamyz.
Memlekettik korporatsııany qurýǵa barlyq bıznes-protsesterdi ońtaılandaryp, avtomattandyrý negiz boldy, ıaǵnı: qyzmet kórsetý ýaqytyn qysqartý jáne qujattar tizimin azaıtý. Alǵashqyda «Azamattarǵa arnalǵan úkimet» 522 qyzmet kórsetse, kelesi etapta 700-den astam memlekettik qyzmet kórsetpek.
