«Azamattarǵa arnalǵan úkimet» memlekettik korporatsııasy balalar sýretteri konkýrsynyń qorytyndysyn shyǵardy

ASTANA. QazAqparat - Astanada «Qazaqstan bala kózimen» taqyrybynda Astana kúnine arnalǵan balalar sýretteri konkýrsynyń jeńimpazdaryn marapattaý saltanaty ótti. Konkýrs «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamy qyzmetkerleriniń balalary arasynda ótkizildi. QR Premer-Mınıstriniń orynbasary Darıǵa Nazarbaeva men QR Aqparat jáne kommýnıkatsııalar mınıstri Dáýren Abaev konkýrstyń jeńimpazdaryna marapat qaǵazdary men syılyqtardy usyndy.

Saltanatty marapattaý kezinde Darıǵa Nazarbaeva osyndaı daryndy balalardy tárbıelegenderi úshin olardyń ata-analaryna alǵys aıtyp, merekelik is-sharaǵa qatysýshylardyń barlyǵyn Astana kúnimen quttyqtady.

Eń úzdik sýretshiler úsh sanat boıynsha tańdaldy: 7 jasqa deıingi balalar, 7 jas pen 11 jas aralyǵyndaǵy jáne 11 jas pen 15 jas aralyǵyndaǵy balalar.  Birinshi, ekinshi jáne úshinshi oryndardyń syılyqtary Almaty, Qostanaı, Pavlodar, Atyraý, Qyzylorda oblystarynyń, sondaı-aq SQO jáne OQO enshisinde ketti. Al balalar sýretteri konkýrsynyń gran-prıi Aqmola oblysynan kelgen 5 jasar Dıas Karamkasov pen 8 jasar Daıana Ydyrysovaǵa jáne qaraǵandylyq 12 jasar Anel Imıshovaǵa buıyrdy.

«Konkýrsanttardyń jalpy sanynan jeńimpazdardy anyqtaý óte qıyn boldy. Qatysýshylar sýret salýdyń kez-kelgen tehnıkasy - gýashpen, akvarelmen, qaryndashpen, flomastermen salynǵan sýretterdi usynǵan. Barlyq jumystar ashyq boıaýly jáne qyzyqty boldy. Bizdiń konkýrstyń maqsaty - balalardy Otanyna degen súıispenshilik pen patrıottyqqa tárbıeleý bolyp tabylady», - dedi «Azamattarǵa arnalǵan úkimet» memlekettik korporatsııa» KE AQ  Basqarma tóraǵasynyń orynbasary Nurbek Orshybekov.

Astana kúni qurmetine balalarǵa merekelik demalys uıymdastyryldy. Balalar Tuńǵysh Prezıdent murajaıynda, QR ulttyq murajaıynda, muhıtaralda, djýnglıde, "Atameken" etno-memorıaldy kesheninde bolyp, «Báıterek" monýmenti alańynan astanamyzdyń ortalyǵyna sholý jasady.

Eske salsaq, memlekettik korporatsııa «Jer kadastry ǵylymı-óndiristik ortalyǵy» RMK, «Jyljymaıtyn múlik ortalyǵy» RMK, «Zeınetaqy tóleý boıynsha memlekettik ortalyq» RMQK jáne «Halyqqa qyzmet kórsetý ortalyǵy» RMK - 4 kásiporyndy qaıta qura otyryp, jumysyn osy jyldyń 11 sáýirinen bastaǵan bolatyn. Búgingi tańda korporatsııa Qazaqstan boıynsha 20 myńnan astam  qyzmetkerdiń basyn biriktirdi.