«Azamattarǵa arnalǵan úkimet» bir rettik qupııasózge qatysty qaýipti seıiltti

ASTANA. QazAqparat - Memlekettik qyzmetti alý barysynda bir rettik qupııasózdi qoldanýdyń esh qaýipi joq. Bul týraly búgin Úkimet úıinde ótken baspasóz máslıhatynda «Azamattarǵa arnalǵan úkimet» memlekettik korporatsııasynyń basqarma tóraǵasy Abylaıhan Ospanov málim etti, dep habarlaıdy QazAqparat.

«Búgingi kúni elektrondyq sandyq qoltańbany eshkim alyp tastaǵan joq. Bir rettik qupııasózdi engizgen kezde ony alynýy ońaı, ári qandaı da bir qaýipi joq qyzmetterde qoldanamyz. Negizinde adam bir rettik qupııasózben qyzmet alý úshin aldymen bizge, ıaǵnı Halyqqa qyzmet kórsetý ortalyǵyna kelýi, sol  nómirdiń tikeleı ózine bekitilgendigi týraly kelisimge qol qoıýy tıis. Osydan keıin baryp ol telefon nómirin JSN-imen baılanystyrady. Sodan soń ǵana ol jeke kabınetinde bir rettik qupııasózdi paıdalaný arqyly mekenjaı anyqtamasy, jyljymaıtyn múlik týraly anyqtama syndy 20-ǵa jýyq qyzmetti ala alady», - dedi ol BAQ ókilderiniń saýalyna oraı.

Onyń aıtýynsha, 15 mınýttyń ishinde bıznes ashý syndy baıypty qyzmetterde elektrondyq tsıfrlyq qoltańba qoldanylady.

«Biz halyq tarapynan ETsQ-ny paıdalaný yńǵaısyz degen pikirlerin estýdemiz. Qaýipsizdik maqsatynda ETsQ bir jylǵa ǵana beriledi. Qazirgi ýaqytta birinshi jartyjyldyqta shamamen 2,5 mln ETsQ jazylyp, qoldanylýda. Bir rettik qupııasózdi qoldanýdyń zańnamaǵa qaıshy bolýy búgingi kúni bizde tirkelmegen», - dedi korporatsııa basshysy.

Osy oraıda QR Aqparat jáne kommýnıkatsııalar mınıstri Dáýren Abaev bir rettik qupııasózdi engizý memlekettik qyzmetterdi alýdy jeńildetý maqsatynda jasalǵanyn atap ótti.

«Menińshe, protsess júrip jatyr jáne biz qalaı bolǵanda da bul protsesti jeńildetýge tıispiz»,-  dedi Abaev.