«Azamattarǵa arnalǵan úkimet»: 150 myń teńge taratylady degen aqparat jalǵan
Biryńǵaı zeınetaqy jınaqtaý qory da ótken aıda ǵana óz salymshylaryna ınflıatsııaǵa baılanysty 150 myń teńgeden taratatyny týraly aqparattyń shyndyqqa saı kelmeıtinin eskertken bolatyn.
Qor (BJZQ) salymshylaryn (tutynýshylaryn) taǵy da mundaı resmı emes aqparattarǵa senbeýge shaqyrdy.
Sondaı-aq, jalǵan aqparat taratý zańdyq turǵyda qýdalanatynyn da eskertken.
Aıta keteıik, sońǵy aptada mundaı jalǵan aqparattar qaıtadan áleýmettik jeliden tarala bastady. Oǵan sengen halyq Halyqqa qyzmet kórsetý ortalyqtaryna aǵylýda.
El ishinde negizinen úsh túrli dybystyq habarlama taralýda.
Onyń ishinde «Qyzdar, sálem! Kimniń atalary, eneleri pensıoner? Atalary 63-ten asý kerek, eneleri 58-den asý kerek. Eger, sondaı pensıonerler bolatyn bolsa TsON-ǵa baryp, ótinish jazady, jazǵannan keıin ınflıatsııaǵa baılanysty pensıonerlerdiń bárine aqsha berip jatyr eken. Meniń enem osy aptanyń basynda baryp zaıavlenıe jazyp keldi, búgin 80 myń teńge tústi bizge. Sony aıtyp qoıaıyn degem. Aqsha eshqashan artyq bolmaıdy ǵoı, ata-enelerińdi jiberińder TsON-ǵa» degen aýdıo júr.
Bul habarlamadan keıin ózin Raıhan dep tanystyrǵan taǵy bir áıel adam 150 myń teńge týraly aqparattyń «feık» emes, ras ekenin aıtyp, taǵy bir jazba taratqan.
Úshinshi aýdıo-jazba er adamnyń daýsymen taraldy. «Salamatsyz ba? Bul pensıonnyı fondtan beriletin aqsha emes, bul Gos.garantııa dep atalady... Bul bir-aq ret tólenetin aqsha, ol 150 myń emes, bireýge 50 myń, bireýge 100 myń, bireýge 10, bireýge 200 myń shyǵady. Ol kezinde qandaı fondta boldy, soǵan baılanysty shyǵatyn aqsha» delingen aýdıo habarlamada.
«WhatsApp arqyly taratylǵan osyndaı aqparattardan soń Almaty qalasyndaǵy Halyqqa qyzmet kórsetý ortalyqtaryna zeınetkerler aǵylyp kelýde. Kezek kútýshiler sany azaıar emes. Úlken kisiler bul aqparattardyń negizsiz, jalǵan ekenin bilmeıtin bolý kerek. Osy jáne ózge de osyǵan qatysty aqparattardyń bári jalǵan. Azamattarǵa ınflıatsııa da, basqasy da eseptelip, zeınetke shyǵa salǵanda tólenetin birrettik tólemde beriledi. Odan bólek aqshanyń qunsyzdanýyna baılanysty eshqandaı da ótemaqy qarastyrylmaǵan», - dedi «Azamattarǵa arnalǵan úkimet» memlekettik korporatsııasy Almaty qalasy fılıalynyń PR-menedjeri Jańyl Ápetova.
Korporatsııa ókilderi halyqqa áleýmettik jeliler arqyly taratylatyn ár túrli habarlamalarǵa senbeı, tek resmı aqparat kózinen alynǵan aqparattarǵa ǵana sený kerektigin aıtady.
Sonymen qatar quzyrly organdardyń aıtýynsha, úlken kisilerge ýaqyttaryn ketirip HQO-larǵa kelýiniń qajeti joq.
