Azamattarǵa áleýmettik kómek 2,5 esege artady – «Amanat» partııasy

ASTANA. QazAqparat – «Amanat» partııasy barlyq máseleni popýlıstik uran emes, áleýmettik-ekonomıkalyq turǵydan qarastyrady. Bul týraly «Qazaqstan» Ulttyq arnasynyń tikeleı efırinde ótip jatqan pikirsaıysta «Amanat» partııasynyń hatshysy Elnur Beısenbaev aıtty, dep habarlaıdy QazAqparat tilshisi.

«Amanat» partııasynyń saılaýaldy baǵdarlamasy shynaıy túrde halyqpen birge jazyldy. Biz osy kúnge deıin el-eldi aralap, 1 mln-ǵa jýyq azamatpen tikeleı kezdestik. Kezdesý barysynda eldiń ishindegi qymbatshylyq, jumyssyzdyq jáne bir azamattyń 1 otbasyn kúndelikti tabysymen asyrap otyrǵanyn kórdik. Árıne, mundaı másele elimizde bar. Biraq, osy máselelerdi sheshýdi tek qana «Amanat» partııasy iske asyra alady degen oıdamyn. Osy kúnge deıingi barlyq máseleni biz popýlıstik urandarmen emes, kerisinshe áleýmettik-ekonomıkalyq turǵydan qarastyryp otyrmyz. Eń birinshiden, «Amanat» partııasy retinde ádiletsizdikti joıýymyz qajet. Olıgopolııaǵa jol bermeı, ondaǵy barlyq máseleni birge talqylaýymyz kerek dep esepteımin. Jemqorlyq túbimen joıylýy tıis. Sonymen qatar ár otbasynyń, ár azamattyń tabysyn arttyrýǵa atsalysýmyz qajet. Ár otbasynyń tabysyn arttyrý úshin biz laıyqty jalaqyny ilgeriletemiz. Sonymen qatar 100-degen kásiporyn ashamyz», - dedi partııa hatshysy.

Onyń atap ótýinshe, ár adam memlekettiń qamqorlyǵynda bolýy kerek.

«Azamattarǵa áleýmettik kómek 2,5 esege artatyn bolady. Árbir azamattyń, onyń ishinde aýyr ónerkásipte júrgen azamattardyń zeınet jasyn tómendetýge atsalysamyz. Qazaqstanda árbir bala baqytty bolýy tıis. Sábılerimiz 100 paıyz balabaqshamen qamtamasyz etilýi qajet. Apatty jaǵdaıdaǵy, úsh aýysymdy mektepterdi túbegeıli joıýymyz kerek. Munan bólek, jastarǵa jańa múmkindikter beremiz. Birinshiden, 1,5 mln jasty jumyspen qamtımyz. Ekinshiden, stýdenttik shákirtaqyny 2 esege arttyramyz. Jastardyń jataqhana máselesin túbegeıli sheshemiz. Jastarǵa múmkindiginshe kómek kórsetemiz», - dedi Elnur Beısenbaev pikirsaıys barysynda.

Eske sala keteıik, «Qazaqstan» ulttyq arnasynyń tikeleı efırinde Májilis saılaýyna qatysatyn 7 saıası partııa ókilderiniń arasynda ótken pikirsaıys birer saǵat buryn aıaqtaldy. Oǵan «Amanat» partııasynan Elnur Beısenbaev, «Aýyl» halyqtyq demokratııalyq partııasynan Jıgýlı Daırabaev, Respublica partııasynan Syrymbek Taý, Qazaqstan Halyq partııasynan Ashat Asylbekov, «Baıtaq» jasyldar partııasynan Azamathan Ámirtaev, «Aq jol» demokratııalyq partııasynan Berik Dúısembınov, al Jalpyulttyq sotsıal-demokratııalyq partııasynan Nurlan Áýesbaev qatysty.