Azamattardyń jeke ómirine qol suǵylmaýshylyq quqyqtaryn qorǵaýǵa arnalǵan zań qabyldandy
ASTANA. Qarashanyń 19-y. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine azamattardyń jeke ómirine qol suǵylmaýshylyq quqyqtaryn qorǵaý máseleleri boıynsha ózgerister men tolyqtyrýlar engizý týraly» zań qabyldandy,
dep habarlaıdy QazAqparat.
Atalǵan zań memleket azamattarynyń jeke ómirine qol suǵylmaýy, óziniń jáne otbasynyń qupııasy bolýy, jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń, poshta, telegraf arqyly jáne basqa da joldarmen alysqan habarlarynyń qupııalylyǵynyń saqtalýy sııaqty sharalardy qabyldaýǵa baǵyttalady.
Atap aıtqanda, Konstıtýtsııada kórsetilgen sondaı bapty iske asyrý boıynsha qosymsha zań deńgeıinde sharalardy júzege asyrý kózdelip otyr. Bul rette azamattardyń jeke ómiriniń, otbasynyń qupııasyn, sondaı-aq jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń jáne taǵy basqalarynyń qupııalylyǵyn buzǵany úshin qylmystyq jaýapkershilikti kúsheıtý qarastyrylady.
Budan basqa, zań arqyly jedel izdestirý materıaldaryn burmalaǵany úshin qylmystyq jaýapkershilikti engizý de qarastyrylyp otyr. Sonymen birge, jedel izdestirý qyzmetiniń qyzmetkerleri úshin jeke ómirge qol suǵylmaýshylyqty qozǵaıtyn málimetterdi jarııalaýǵa qatysty shekteýler aıasy keńeıtiledi. Sonymen birge, zańda jedel izdestirý sharalarynyń zańdylyǵyn, onyń ishinde telekommýnıkatsııa jelileri men poshtalyq baılanys arnalaryndaǵy zańdylyqty qadaǵalaý kezinde prokýrordyń ókilettigin naqtylaý normasy da qamtylǵan.
Qujat Elbasynyń qol qoıýyna jiberiledi.
