Azamattardyń jeke ómirine qol suǵýshylyqty boldyrmaýǵa baǵyttalǵan zań jobasy sóz bostandyǵyn shektemeıdi - M. Tinekeev

ASTANA. Qarashanyń 10-y. QazAqparat /Qanat Mámetqazyuly/  - Búgin QR Parlamenti Májilisi Zańnama jáne sot-quqyqtyq reforma komıtetiniń keńeıtilgen otyrysy bolyp ótti. Onda depýtattar «Qazaqstan Respýblıkasynyń keıbir zańnamalyq aktilerine azamattardyń jeke ómirine qol suǵylmaýshylyq quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylady,

 dep habarlaıdy QazAqparat.

 Atalǵan zań jobasy memleket azamattarynyń jeke ómirine qol suǵylmaýy, óziniń jáne otbasynyń qupııasy bolýy, jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń, poshta, telegraf arqyly jáne basqa da joldarmen alysqan habarlarynyń qupııalylyǵynyń saqtalýy sııaqty sharalardy qabyldaýǵa baǵyttalady.

 Atap aıtqanda, Konstıtýtsııada kórsetilgen sondaı bapty iske asyrý boıynsha qosymsha zań deńgeıinde sharalar qabyldaý kózdelip otyr. Bul rette azamattardyń jeke ómiriniń, otbasynyń qupııasyn, sondaı-aq jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń jáne taǵy basqalarynyń qupııalylyǵyn buzǵany úshin qylmystyq jaýapkershilikti kúsheıtý qarastyrylady.

Komıtet otyrysynda qujatty ekinshi oqylymda talqylaý barysynda depýtat Ramazan Sárpekov áriptesteri tarapynan naqtylaý sıpatynda túzetýler usynylǵanyn atap ótti. Ondaı túzetýler jobany ázirleýshi taraptan da qoldaý tapqan. Al depýtat Muhtar Tinekeev jobaǵa qatysty óz oıyn bildire kele, atalǵan qujattyń sóz bostandyǵyn shekteýge baǵyttalmaǵandyǵyn atap ótti. «Shyndyǵynda, birqatar BAQ ókilderi zań jobasyn sóz bostandyǵyna qarsy baǵyttalǵan dep sanaıdy, bul olaı emes. Qujatta Ata zańymyzda kórsetilgen bapty júzege asyryp, Qazaqstan azamattarynyń jeke ómirlerine qol suǵylmaýshylyqqa qatysty quqyqtary qamtamasyz etiletin bolady», dedi depýtat.

Zań jobasy palatanyń jalpy otyrysyna ekinshi oqylymǵa shyǵarylady.