Azamattardyń sý obektilerindegi qaýipsizdigin qamtamasyz etý máselesin retteıtin normatıvti-quqyqtyq aktiler qabyldaý qajet - QR Bas prokýratýrasy
ASTANA. 13 maýsym. QazAqparat - Qazaqstan Respýblıkasy Bas prokýratýrasy demalys jáne shomylatyn oryndarda, sý aıdyndarynda azamattardyń qaýipsizdigin qamtamasyz etý salasyndaǵy zańdylyqtyń saqtalýyna taldaý jasady,
dep habarlaıdy vedmstvonyń baspasóz qyzmeti.
Taldaý nátıjesi sý jaǵalaýlaryndaǵy demalys oryndarynyń ereje boıynsha eskertý belgilerimen, qutqarýshy bekettermen jáne alǵashqy medıtsınalyq kómek kórsetý qyzmetimen jabdyqtalmaǵanyn kórsetti. Osynyń saldarynan respýblıka kóleminde sý aıdandarynda qaıtys bolǵan jáne zardap shekken adamdardyń sany arta túsýde. Atap aıtqanda, 2009 jyly sý aıdyndarynda 466 adam qaıtys bolsa, 2010 jyly olardyń sany 636-ǵa jetken.
Prokýrorlar anyqtaǵandaı, sý aıdyndaryndaǵy adamdardyń qaýipsizdigi máseleleri sýdaǵy qutqarýshy stansalardyń jetkiliksizdigi men olardyń jaǵdaıynyń nasharlyǵyna baılanysty.
Respýblıka boıynsha sý aıdyndarynda shomylýǵa jáne demalýǵa arnalǵan 721 oryn resmı túrde tirkelgen. Al óz kezeginde barlyǵy 58 sýdaǵy qutqarýshy stansalar jumys jasasa, olardyń ishinde tek 29-y ǵana joǵarydan baqylaıtyn baǵanalar. Sondyqtan sýdaǵy qutqarýshy qyzmetter sanynyń azdyǵyna jáne materıaldy-tehnıkalyq jaǵynan jetkiliksiz qamtamasyz etilgenine baılanysty olardyń shomylý kezeńinde jaǵalaýdan tıisti deńgeıde baqylaý jasaýǵa múmkinshiligi joq.
Tekserý nátıjesi boıynsha Bas prokýratýra Úkimmettiń nazaryn azamattardyń sý obektilerindegi qaýipsizdigin qamtamasyz etý máselesin retteıtin normatıvti-quqyqtyq aktilerdi jáne aýmaqtyq sýdaǵy qutqarýshy qyzmetterdiń júıesin damytýǵa baǵyttalǵan sharalardy qabyldaý qajettiligine aýdardy.
