Azamattardyń shaǵymymen bıyl 200-ge tarta polıtseı sottaldy
ASTANA. QazAqparat - Azamattardyń shaǵymymen bıyl 200-ge tarta polıtseı qylmystyq jaýapkershilikke tartyldy. Bul týraly búgin Ortalyq kommýnıkatsııalar qyzmetinde ótken brıfıngte Іshki ister organdary qyzmetiniń máseleleri boıynsha qoǵamdyq keńestiń tóraǵasy, zań ǵylymdarynyń doktory, professor Marat Qoǵamov málim etti.
«Qyzmettik tekseristerden anyqtalǵanyndaı, byltyr synı maqalalarǵa baılanysty 92 adam jazaǵa tartyldy, bıyl shamamen 50 qyzmetker jazalandy. 2015 jyly 350 synı maqala jarııalanǵan, 2016 jyly jarııalanymdar sany 200-den asady. Tıisinshe, 92 jáne 50 qyzmetker tártiptik jazaǵa tartylǵan», - dep atap ótti ol.
Onyń sózine qaraǵanda, halyqtyń aryz-shaǵymyna baılanysty qyzmettik tekserister júrgizilip, artynsha qylmystyq jaýapkershilikke tartylǵan polıtseılerdiń sany odan birneshe ese kóp. Jalpy azamattardan jyl saıyn polıtseılerdiń áreketterine jáne kerisinshe áreketsizdigine qatysty 10 myńnan astam aryz túsedi.
«Aryz-shaǵymdarǵa keletin bolsaq, olardyń sany myńdap sanalady. Jyl saıyn polıtseılermen zań buzý boıynsha 10 myńnan astam aryz-shaǵym túsedi. Onyń jartysy aqparatty tirkeý kitabyna tirkeledi. Byltyrǵy jáne aǵymdaǵy jyldy alyp qaraıtyn bolsaq, 2015 jyly 200 adam qylmystyq jaýapkershilikke tartylyp, sottalsa, 2016 jyldyń 10 aıynda shamamen taǵy sonsha qyzmetker jaýapqa tartyldy. Bul jeke jáne zańdy tulǵalardyń aryz-shaǵymy boıynsha. Onyń ishinde BAQ betterindegi synı basylymdar da bar», - dep atap ótti M. Qoǵamov.
Aıta keteıik, sońǵy kezderi polıtseılerdiń jaǵa ustatarlyq áreketteri BAQ betterinde kóptep qylań berýde. Jaqynda ǵana Astanada Monako komıssaryna aıyppul salmaq bolǵan polıtseıler jumystan qýyldy. Olarǵa qatysty QR Qylmystyq kodeksiniń 366 baby - «Para alý» boıynsha qylmystyq is qozǵaldy.
Sonymen qatar bıyl Almatyda kólikte otyryp dáret syndyrǵan polıtseı men onyń áriptesi jumystan bosatyldy.
