Azamattardyń keıbir sanattaryna 10 jáne 20 myń teńge áleýmettik kómek beriletin bolady
ASTANA. 21 qarasha. QazAqparat - Qazaqstan Respýblıkasy Tuńǵysh Prezıdenti kúnine áleýmettik kómek azyq-túlik taǵamdarynan basqa aqshalaı tólem túrinde de beriletin bolady. Bul týraly astana.kz saıtyna qalalyq Jumyspen qamtý jáne áleýmettik baǵdarlamalar basqarmasynan málim etti.
Aqshalaı tólem túrinde áleýmettik kómek myna sanattaǵy azamattarǵa beriledi: 20 000 teńge kóleminde - Uly Otan soǵysynyń qatysýshylary men múgedekterine; 10 000 teńge kóleminde: jeńildikter men kepildikter boıynsha Uly Otan soǵysynyń qatysýshylary men múgedekterine teńestirilgen adamdarǵa;
Uly Otan soǵysy jyldary tyldaǵy janqııarlyq eńbegi men minsiz áskerı qyzmeti úshin burynǵy KSRO ordenderi, medaldarymen marapattalǵan adamdarǵa, sondaı-aq, 1941 jyldyń 22 maýsymynan 1945 jyldyń 9 mamyryna deıin alty aıdan kem emes tylda jumys istegen (qyzmet etken);
Uly Otan soǵysy jyldarynda jergilikti áýe qorǵanysynyń nysandyq jáne apattyq komandasy ózin-ózi qorǵaý tobynyń jeke quramy qatarynda bolyp qaza tapqan jaýyngerlerdiń jesirlerine, Lenıngrad gospıtalderi men aýrýhanalarynda kóz jumǵan qyzmetkerlerdiń ekinshi ret nekege otyrmaǵan jesirlerine;
qaza tapqan Uly Otan soǵysy múgedekteriniń jáne olarǵa teńestirilgen múgedekterdiń áıelderine (erlerine), sondaı-aq, qaza tapqan soǵysqa qatysýshylardyń, partızandar men astyrtyn uıym músheleriniń áıelderine (erlerine), «Lenıngradty qorǵaǵany úshin» medalimen jáne «Lenıngrad qorshaýynyń turǵyny» belgisimen marapattalǵandarǵa, aýrýdan múgedek dep tanylǵan, eńbekte nemese basqa da jaǵdaılarda múgedektik alǵan (zańǵa qaıshy jaǵdaılardan basqa) ekinshi qaıtara nekege turmaǵan adamdarǵa;
qaıtys bolǵan áskerı qyzmetkerdiń otbasyna, mártebesi «Uly Otan soǵysynyń qatysýshylary men múgedekteri jáne olarǵa teńestirilgen adamdardyń jeńildikteri jáne áleýmettik qorǵalýy týraly» 1995 jylǵy 28 sáýirdegi Qazaqstan Respýblıkasy Zańynyń 9 baby 1 tarmaǵymen aıqyndalǵan adamdarǵa;
eki birdeı nemese jalǵyz ata-anasynan aıyrylǵan jetim balalarǵa; 18 jasqa deıingi eki jáne odan da kóp balasy bar kópbalaly otbasyna.
