Azamattardyń bilikti zań kómegin alý jónindegi konstıtýtsııalyq quqyqtaryn jetildirý qajet - R. Muqashev
ASTANA. 11 jeltoqsan. QazAqparat - QR 2020 jylǵa deıingi Quqyqtyq saıasat tujyrymdamasyna sáıkes, azamattardyń bilikti zań kómegin alý jónindegi konstıtýtsııalyq quqyqtaryn jetildirý talap etiledi. Bul týraly búgin Parlament Májilisinde «Memleket kepildik bergen bilikti zań kómegin quqyqtyq retteý problemalary» degen taqyryptaǵy konferentsııa barysynda Zańnama jáne sot-quqyqtyq reforma komıtetiniń tóraǵasy Rahmet Muqashev málim etti.
«Bilikti zań kómegin usyný júıesi jaqsartýdy talap etedi. Bunymen qosa, aýyldyq jáne qalalyq jerlerdegi advokattyq qyzmettermen teńdeı qamtylmaý problemasyn de sheshýge tıispiz. Osy jáne basqa da ózekti máseleler parlamenttiń qaraýyna usynylǵan «Memleketpen kepildendirilgen zańgerlik kómek týraly» zań jobasynda qamtylyp otyr», - deıdi komıtet tóraǵasy. Onyń aıtýynsha, zań jobasy zańgerlik kómek usynatyn advokattar eńbegine aqy tóleýdiń ákimshilik olqylyqtaryn joıýǵa baǵyttalady. Budan bólek, zań jobasymen alǵash ret quqyq qoldaný praktıkasynda zańgerlik kómek kórsetetin sýbektiler retinde memelkettik organdardy, joǵary oqý mekemelerin, úkimettik emes uıymdardy qarastyrý usynylady. Zańgerlik kómektiń jańa formalary: quqyqtyq, aqparattyq, konsýltatsııalyq kómekter engiziledi.
Eske sala keteıik, konferentsııa jumysyna Parlament depýtattary, quqyq qorǵaý jáne sot uıymdarynyń ókilderi, qazaqstandyq jáne halyqaralyq sarapshylar qatysty. Forýmdy Respýblıkalyq advokattar alqasy, EQYU Astanadaǵy Ortalyǵy, Qazaqstandaǵy Eýropalyq Odaq ókilderi, Qazaqstan Respýblıkasyndaǵy sot jáne quqyqtyq reformany qoldaý jobasyn júzege asyrýshylar uıymdastyryp otyr.
