Azamattardyń 90 paıyzy eldegi dinı ahýaldy qalypty dep baǵalady - Din isteri komıteti
Búgin Mádenıet jáne sport mınıstrliginiń keńeıtilgen alqa májilisinde Din isteri komıtetiniń tóraǵasy Ǵalym Shoıkın osylaı málim etti.
«Elimizdegi búgingi kúndegi dinı ahýaldy turaqty dep baǵalaýǵa bolady. Memlekettik-konfessııalyq jáne konfessııaaralyq qarym-qatynastar júıeli damýda. Din isteri agenttigimen aǵymdaǵy jyly júrgizilgen saýalnama nátıjeleri azamattardyń 90 paıyzǵa jýyǵy eldegi dinı ahýaldy qalypty dep baǵalaıtynyn, al din salasyndaǵy memlekettiń saıasatyn azamattardyń 86 paıyzy qoldaıtynyn kórsetip otyr»,-dedi komıtet basshysy.
Atap aıtqanda, qazirgi tańda Qazaqstanda 18 konfessııany quraıtyn 3483 din sýbektisi qyzmet atqarady. Olardyń ishinde musylmandyq uıymdar basym kópshilikti quraıdy - 2413. Dinı ǵımarattardyń basym bóligi de Islamǵa tıesili - 2381 meshit.
Elimizde Qazaqstan pravoslavıe shirkeýi - 303, Rım-katolık shirkeýi - 84, al protestanttyq qaýymdastyqtardyń sany 600-den astam.
Bulardan bólek, 7 ıýdeılik, 2 býddıstik jáne 18 jańa dinı uıymdardyń dinı birlestikteri qyzmet atqarady.
