Azamattardyń 75 paıyzy dinaralyq qatynastar boıynsha memlekettik saıasatty qoldaıdy
Búgin Májilistiń Halyqaralyq ister, qorǵanys jáne qaýipsizdik komıteti men Áleýmettik-mádenı damý komıtetiniń kóshpeli otyrysynda Mádenıet jáne sport vıtse-mınıstri Marat Ázilhanov osylaı málimdedi. Eske salaıyq, otyrysta dinı toleranttylyq pen konfessııaaralyq kelisimdi nyǵaıtý máseleleri talqylanǵan bolatyn.
Vıtse-mınıstrdiń aıtýynsha, elimizdegi dinı ahýal turaqty sıpatta bolyp otyr. Memlekettik-konfessıonaldyq jáne konfessııaaralyq qatynastardyń syndarly formasy damý ústinde. Máselen, búgingi kúni elimizdegi túrli din jáne konfessııalar ókilderi arasynda tıimdi ózara baılanys ornaǵan. «Aǵymdaǵy jyly júrgizilgen áleýmettik saýalnamalar málimetteri boıynsha suralǵan azamattardyń 85 paıyzy elimizdegi dinı ahýaldy jaǵymdy dep baǵalaǵan. Sonymen qatar, azamattardyń 75 paıyzy dinaralyq qatynastar salasyndaǵy memlekettik saıasatty qoldaıdy. Osy málimetterdiń ózi din salasynda qabyldanyp jatqan dinı jaǵdaıdy turaqtandyrýǵa járdemdesetin memlekettik saıasattyń tıimdiligin kórsetip otyr», - deıdi M. Ázilhanov.
Sonymen qatar, vıtse-mınıstr qoǵamdaǵy dinniń róli artqan saıyn keıbir adamdar tobynyń dinı ómirinde teris qyrlary da baıqalatynyn atap ótti. «Sonyń ishinde azamattardyń ishinara radıkaldanǵan kózqaras úderisteri baıqaldy, qazaqstandyq qoǵamnyń rýhanı negizine jik salatyn dinı ekstremızm faktileri belgili boldy. Ókinishke qaraı, halyqaralyq terrorısterdiń radıkaldy úndeýlerine berilgen jekelegen qazaqstandyqtar túrli jol taýyp Sırııa men Iraktaǵy qaqtyǵys aımaqtaryna attandy», - dedi vıtse-mınıstr.
