Azamattardyń jeke málimetteriniń taralýyna jazany qatańdatý kerek — Oljas Bektenov
ASTANA. KAZINFORM — Telefon jáne ınternet-alaıaqtyq jaǵdaılary kóbeıip jatyr. Bul týraly Úkimet otyrysynda Premer-mınıstr Oljas Bektenov málim etti.
— Salanyń damýyna serpin berý úshin «Qoljetimdi Internet» ulttyq jobasy qabyldandy. Ol 2027 jylǵa qaraı elimizdi baılanys jelilerimen jáne eń kemi sekýndyna 100 Mbıt bolatyn jyldamdyǵy joǵary ınternetpen 100% qamtýǵa múmkindik beredi. Jasandy ıntellekt mınıstrliginiń aldynda osy ulttyq jobada josparlanǵan barlyq is-sharany tıimdi oryndaý mindeti tur, — dedi Oljas Bektenov.
Sonymen qatar ol búginde telefon jáne ınternet-alaıaqtyq jaǵdaılary kóbeıip jatqanyn aıtty. Olardyń deni sheteldik nómirlerdiń jáne ulttyq júıemizde tirkelmegen qurylǵylardyń kómegimen jasalady. Sondyqtan Jasandy ıntellekt jáne Іshki ister mınıstrlikteri osyndaı zańsyz áreketterge tosqaýyl qoıý jumystaryn kúsheıtýi qajet.
— Derekter bazasynan azamattardyń derbes málimetteriniń taralyp ketkeni úshin jazany qatańdatý kerek. Mundaı talap memlekettik organdarmen qatar, qarjy uıymdaryna, mobıldi operatorlar men jeke bızneske de qatysty bolýǵa tıis. Balalardyń tsıfrlyq keńistikte qorǵalýyn qamtamasyz etý úshin sim kids jobasynyń tájirıbesin keńinen taratý kerek. Ekinshiden, baılanys nysandaryn salý kezinde basy artyq bıýrokratııadan aryla almaı kelemiz. Keıde antenna baǵanyn ornatý jumystarynyń ózi bir jylǵa deıin sozylyp ketýi múmkin. Jappaı tsıfrlandyrý jaǵdaıynda mundaı úderisterdi ońtaılandyryp, barynsha jedeldetý kerek. Jasandy ıntellekt mınıstrligine Ónerkásip jáne qurylys mınıstrligimen jáne baılanys operatorlarymen birge bir aı merzimde osy másele boıynsha naqty usynystar ázirleýdi tapsyramyn, — dedi Úkimet basshysy.
Munymen qosa ol eldi mekenderde baılanys pen ınternet sapasy tómen aımaqtardyń máselesin birjola sheshý úshin óńir ákimdikterine baılanys operatorlaryna bazalyq stantsııalar ornatýǵa oryn bólýge, sonyń ishinde kez kelgen qolaıly nysandarda ornalastyrýǵa járdemdesýdi tapsyrdy.
Buǵan deıin habarlanǵandaı, 2027 jyldyń sońyna deıin halyqtyń 100 paıyzy ınternetpen qamtylady.