Azamattardyń jeke derekteriniń taralýyna jol bermeý úshin qandaı sharalar qabyldandy

ASTANA. KAZINFORM — Elimizde jeke derekterdiń taralyp ketýine jol bermeýge baǵyttalǵan sharalar kúsheıtildi. Bul týraly Májilis janyndaǵy Qoǵamdyq keńes otyrysynda Jasandy ıntellekt jáne tsıfrlyq damý vıtse-mınıstri Rostıslav Konıashkın aıtty. 

Onyń aıtýynsha, sońǵy ýaqyttaǵy derekterdiń taralýyna baılanysty atyshýly oqıǵalardyń basym bóligi memlekettik bazalarmen emes, jeke platformalarmen — agregatorlar jáne mıkroqarjy uıymdarymen baılanysty.

— Bul jerde biz barlyq memlekettik organdy, onyń ishinde jekemenshik uıymdardy da azamattyń kelisiminsiz derekterdiń syrtqy aqparattyq júıelerge múldem ketpeýi tıis júıege qosylýyn mindettep otyrmyz. Sol sáttegi azamattyń qoldanystaǵy barlyq kelisimin biz eGov Mobile mobıldi qosymshasynda kórsetemiz, — dep atap ótti Rostıslav Konıashkın.

Ol árbir azamat eGov Mobile arqyly óz derekterin óńdeýge kimge jáne qashan kelisim bergenin teksere alatynyn aıtty.

— Bul kelisimderdiń bir bóligi uzaqmerzimdi, mysaly, nesıeler boıynsha uzaqqa sozylatyny túsinikti. Sebebi bankter siz nesıeni japqan kúnniń ózinde de biraz ýaqytqa deıin derekterińizdi saqtaýǵa mindetti. Bul rette shynymen de kóp suraq týyndaıdy: kimniń qandaı ókilettigi bar jáne bul derekter qansha merzimge deıin saqtalýy tıis. Bul retteý sharalaryn da aldaǵy ýaqytta kúsheıtýdi josparlap otyrmyz, — dedi vıtse-mınıstr.

Aıta keteıik, osy jyldyń maýsymynda «Qazaqstan turǵyndary 2024» ataýymen tirkelgen jańa aýqymdy derekqordyń ınternet keńistigine taraǵany anyqtalǵan edi.