Azamattardyń jalǵyz avtokóligin bankterdiń paıdasyna ótkizbeý usynysy qaralady
ASTANA. KAZINFORM – Senatorlar adamdardyń jalǵyz baspanasy men tabys kózi retinde paıdalanyp júrgen jalǵyz avtokóligin bankterdiń paıdasyna óndirmeýdi usyndy.
Búgin Senattyń jalpy otyrysynda depýtat Sultan Dúısembınov jalǵyz tabys kózi retinde paıdalanyp júrgen avtokólikti ıesinen bank qaryzy retinde óndirip almaý máselesin kóterdi.
«Zań azamattardyń quqyqtaryn qorǵaýǵa baǵyttalǵan. Qujatta kámeletke tolmaǵan balalary bar otbasylardy jáne múgedektigi bar adamdardy jylý berý maýsymynda (qysta) jalǵyz turǵyn úıden shyǵarýǵa tyıym salýdy engizý jónindegi túzetýler eskerilgen. Sonymen qatar, ómirde túrli jaǵdaılar bolatynyn bilemiz. Máselen, adamnyń jalǵyz tabys kózi retinde avtokóligi nemese arnaıy qural-saımany bolýy múmkin. Mınıstrlik tarapynan bolashaqta azamattardyń jalǵyz tabys kózi sanalatyn múlikti óndirip alýdy qorǵaıtyn normalar engizý nemese sheshý joldary qarastyryla ma?», - dep surady S. Dúısembınov.
Bul turǵyda Ádilet vıtse-mınıstri Bekbolat Moldabekov zańnamada qural-saımandar azamattyń tabys kózi retinde paıdalanylsa, ony alyp qoımaý normasy eskerilgenin aıtty.
«Avtokólikke toqtalsaq, eger de azamat taksıde jumys isteıtin bolsa jáne de sonymen ǵana kún kóretin bolsa, onda onyń avtokóligin de almaıtyndaı tıisti baptardy engizýge daıynbyz», - dedi vıtse-mınıstr.
Óz kezeginde Senat tóraǵasy jalǵyz baspanadan adamdardy shyǵarýǵa tyıym salý máselesine toqtaldy.
«Jylý berý maýsymynda jalǵyz baspanadan adamdar shyǵarylmaıdy degen máseleler qamtylyp jatyr. Bul máseleni depýtattarymyz da kóterip júr. Al endi kóktemde jylytý maýsymy aıaqtalǵannan keıin jalǵyz baspanadan adamdardy shyǵarýǵa bolady ǵoı, solaı ma? Endi bul másele qalaı bolady? Bul jerde de qaraýymyz kerek, ıaǵnı ártúrli áleýmettik qıyndyqtarǵa alyp keletini túsinikti. Sondyqtan jalǵyz baspanasynan shyǵarylmasyn, sonda tura bersin desek, onda bul bankterdiń múddelerine qarsy bolýy múmkin. Osy problema adamdardy teris áreketterge jeteleýi ábden yqtımal. Biraq osy máseleni taǵy da bir márte qaraýymyz kerek sııaqty», - dedi M. Áshimbaev.
Senat spıkeri jalǵyz baspanany kepildik retinde almaý múmkindigin qaraý usynysyn aıtty.
«Bul taqyrypty pysyqtaý kerek. Óıtkeni kóptegen jaǵdaılar bar ǵoı, jalǵyz baspanasynan aıyrylyp, dalada qalǵan adamdar da az emes. Osyndaı jaǵdaılardy boldyrmaý úshin sony da bir qarap, keıinirek bir zańdarǵa tıisti ózgerister engizýimiz kerek sııaqty», - dedi M. Áshimbaev.
