Azamattardyń máselesin sotqa jetkizbeı sheshý: «Ádiletti Orta» jobasy iske qosyldy
ASTANA. KAZINFORM — «Ádilet» partııasy azamattar men bıznes ókilderiniń quqyqtyq máselelerin sheshýge baǵyttalǵan «Ádiletti Orta» jobasyn iske qosty.
Partııanyń baspasóz qyzmetiniń málimetinshe, jańa alań azamattar men kásipkerlerdiń óz quqyqtaryn qorǵaý kezinde kezdesetin suraqtardy sheshýmen aınalysady. Munda azamattardyń quqyqtyq máselelerine qatysty jeke ótinishteri qaralyp, qoldanystaǵy zańnamany jetildirý boıynsha usynystar ázirlenedi. Bul týraly búgin «Ádiletti Orta» jıynynyń alǵashqy otyrysynda partııa tóraǵasynyń orynbasary Nursultan Baıtilesov málimdedi. Alqaly jıynǵa Quryltaı depýtattary, memlekettik jáne quqyq qorǵaý organdarynyń ókilderi, zańgerler men quqyq salasynyń sarapshylary qatysty.
Ortalyq «Zań men tártip» qaǵıdatyn iske asyrý maqsatynda quryldy. Bul — memlekettik saıasattyń negizgi baǵyttarynyń biri. Memleket basshysy Qazaqstan halqyna Joldaýynda zańdy qurmetteý men azamattyq jaýapkershilik qoǵam ómiriniń negizine aınalýy kerek ekeni atap ótken bolatyn.
Partııa tóraǵasynyń orynbasary Nursultan Baıtilesovtiń aıtýynsha, azamattardyń keıbir ótinishteri qoldanystaǵy zańdardy jáne olardyń is júzinde qalaı oryndalyp jatqanyn jan-jaqty taldaýdy qajet etedi. Sondyqtan «Ádiletti Orta» tek ótinishterdi qaraýmen shektelmeıdi. Basty maqsat — quqyqtyq máselelerdiń sebepterin anyqtaý, olardyń aldyn alý jáne bolashaqta osyndaı jaǵdaılardyń qaıtalanbaýy úshin naqty sheshimder usyný.
— Biz úshin ádilettilik tek qana zań júzinde nemese Konstıtýtsııada ǵana jazylyp qalǵan qaǵıda bolyp qalmaı ár adamnyń kúndelikti ómirinde sezilýi mańyzdy. Biz qoǵamnyń suranysyn, sarapshylardyń múmkindikterin, depýtattardyń jumysyn biriktire otyryp, quqyq salasyndaǵy mańyzdy máselelerdi júıeli kóterýge kúsh salýdy kózdep otyrmyz, — dedi ol.
«Ádiletti Orta» ortalyǵynyń jetekshisi Abzal Quspan negizgi segiz baǵytty tanystyrdy. Olardyń qatarynda azamattarǵa quqyqtyq keńes berý, zańnamany taldaý, zańdardy qarapaıym ári túsinikti tilde túsindirý, medıatsııany damytý jáne daýlardy sheshýge kómektesý qadamdary bar. Sonymen qatar óńirlerdegi quqyqtyq máselelerdi sheshýge de erekshe kóńil bólinedi.
— Ortalyq jumysy aıasynda «Bir fılıal — bir jeńis» jáne «Depýtattyq kelisimshart 3-2-1» bastamalaryn júzege asyrý, sondaı-aq biryńǵaı baılanys ortalyǵyn uıymdastyrý josparlanyp otyr. Basty mindetimiz — azamattardyń máselelerin sotqa jetkizbeı, tikeleı jergilikti jerde sheshýge jaǵdaı jasaý. Ol úshin túsken shaǵymdarǵa jaýap berip qana qoımaı, júıeli máselelerdi der kezinde anyqtap, olardyń týyndaý sebepterin joıý jáne bolashaqta mundaı jaǵdaılardyń aldyn alý mańyzdy, — dedi Abzal Quspan.
Taǵy bir mańyzdy baǵyt — qoldanystaǵy zańdardaǵy qaıshylyqtar men olqylyqtardy anyqtaý. Bul jumys jańa Konstıtýtsııa qabyldanǵannan keıin zańnamany jańartý jaǵdaıynda erekshe ózekti bolyp otyr.
Aldaǵy ózgeristerdiń aýqymy týraly Ádilet vıtse-mınıstri Botagóz Jaqselekova baıandady. Onyń aıtýynsha, birinshi kezeń aıasynda memlekettik basqarýdyń jańa modeliniń jumys isteýine qajet zańnamalyq negiz qalyptastyrylǵan. Atap aıtqanda, 5 derbes konstıtýtsııalyq zań jáne 4 ilespe zań qabyldanyp, olar arqyly 9 konstıtýtsııalyq zańǵa, 15 kodekske jáne 51 zańǵa ózgerister engizildi. Qazirgi ýaqytta Konstıtýtsııany iske asyrýdyń ekinshi kezeńi júrgizilýde. Ol salalyq zańnamany Konstıtýtsııanyń erejelerine sáıkestendirýdi kózdeıdi. Memlekettik organdar 173 zańǵa redaktsııalyq túzetýler ázirlep, sondaı-aq jekelegen konstıtýtsııalyq jańashyldyqtardy mazmundyq turǵydan júzege asyrý jóninde usynystar engizdi.
Jıynda qazaqstandyqtardy jıi mazalaıtyn máselelerdi anyqtaý joldary da talqylandy. Quryltaı depýtaty Aleksandr Danılov eOtinish platformasy arqyly joldanǵan ótinishter men áleýmettik jelilerdegi pikirlerdi de taldaýdy usyndy. Mundaı tásil jıi qaıtalanatyn jáne júıeli túrde sheshýdi qajet etetin máselelerdi anyqtaýǵa múmkindik beredi.
Al depýtat Únzıla Shapaq zańnamany keshendi túrde taldaý qajet ekenine nazar aýdardy. Onyń aıtýynsha, jekelegen zań normalaryn ǵana emes, olardyń ózara baılanysyn jáne is júzinde qalaı jumys isteıtinin de baǵalaý mańyzdy.
Kezdesý qorytyndysy boıynsha qatysýshylar zańnamadaǵy olqylyqtar men qaıshylyqtardy joıýǵa qatysty usynystar ázirleý jumysyn birlesip jalǵastyrýǵa ýaǵdalasty. Osylaısha, «Ádiletti Orta» ortalyǵy azamattardyń máseleleri talqylanyp qana qoımaı, zańdar men olardy qoldaný tájirıbesin ózgertýge baǵyttalǵan naqty usynystar ázirlenetin alańǵa aınalmaq.
Osyǵan deıin Qyzylordada qandaı quqyqbuzýshylyqtar jıi tirkelgeni belgili boldy.
