Azamattardyń kredıtterin kollektorlarǵa satýǵa moratorıı 2027 jylǵy 1 mamyrǵa deıin uzartylmaq
ASTANA. KAZINFORM — 2026 jylǵy shildeden ıpotekalyq kredıtter boıynsha jyldyq tıimdi syıaqy mólsherlemesi 25-ten 20 paıyzǵa deıin tómendetiledi.
Bul týraly Úkimet otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
— Úkimettiń, Ulttyq bank pen agenttiktiń birlesken is-qımyl baǵdarlamasy aıasynda bızneske kredıt berýdi yntalandyrý jáne halyqtyń shamadan tys kredıt alýyn azaıtý jóninde mynadaı sharalar iske asyrylatyn bolady. Birinshiden, korporatıvtik kredıt berýdi odan ári yntalandyrý úshin 2026 jylǵy 1 sáýirden bastap bólshek kredıtter boıynsha kapıtaldyń sektorlyq kontrtsıkldik býferi 2 paıyzdyq deńgeıde iske qosylady. Kelesi jyly agenttik bızneske kredıt berýdi ulǵaıtý úshin ýaqytsha prýdentsııalyq sharalardy iske asyrýdy jalǵastyrady. Atap aıtqanda, ótimdilik koeffıtsıentteriniń 0,9 deńgeıindegi tómendetilgen mánderi uzartylady, bul 3 trln teńgege deıin ótimdilikti bosatýǵa múmkindik beredi. Bankterdi qorlandyrý qurylymyn ártaraptandyrý jáne neǵurlym turaqty jáne uzaq merzimdi resýrstardyń úlesin ulǵaıtý jóninde sharalar qabyldanatyn bolady. Jalpy alǵanda, bankterdiń resýrstaryn naqty sektordy kredıtteýge barynsha tartýǵa baǵyttalǵan sharalar qabyldanady, — dedi agenttik basshysy.
Onyń aıtýynsha, ekinshiden, agenttik Ulttyq bankpen birlesip, qaryz somasynyń turǵyn úı qunyna qatynasyna qaraı ıpoteka boıynsha mólsherlemelerdi aıqyndaýdyń jańa ádistemesin ázirleıdi. Kepilsiz tutynýshylyq kredıtterge qatysty naryqtyq derekter negizinde shekti jyldyq tıimdi syıaqy mólsherlemesin esepteý ádistemesi qaıta qaralady.
— Úshinshiden, tutynýshylyq kredıt berýdegi táýekelderdi azaıtý úshin 2026 jyly jıyntyq boryshtyń jyldyq kiriske qatysty koeffıtsıenti iske qosylyp, onyń normatıvtik máni belgilenedi. Sondaı-aq borysh júktemesiniń koeffıtsıentin esepteý qatańdatylady, — dedi ol.
Agenttik basshysynyń aıtýynsha, tórtinshiden, ótken jyly kollektorlarǵa azamattardyń kredıtterin satýǵa 2026 jylǵy 1 mamyrǵa deıin moratorıı engizildi. Nátıjesinde kollektorlyq agenttikterde problemalyq qaryz alýshylardyń sany 54 paıyzǵa azaıdy. Tıimdilikti eskere otyryp, moratorıı merzimin 2027 jylǵy 1 mamyrǵa deıin uzartý josparlanyp otyr.
— Besinshiden, problemalyq qaryz alýshylardyń sanyn azaıtý maqsatynda, sottan tys bankrottyq rásimin odan ári jeńildetý júrgiziletin bolady. Qarjy uıymdary sottan tys bankrottyq qoldanylatyn problemalyq qaryz alýshylardy anyqtaıtyn bolady jáne sottan tys bankrottyq múmkindigi týraly SMS-habarlama arqyly azamattardy habardar etý tetigi engiziledi. Atalǵan sharalar bankterdiń resýrstaryn bızneske kredıt berýdiń paıdasyna qaıta bólýge yntalandyrady, tutynýshylyq kredıt berýdiń ósýin tejeıdi jáne nátıjesinde, qarjylyq turaqtylyqty nyǵaıtyp, azamattardyń múddelerin qorǵaıtyn bolady, — dedi Mádına Ábilqasymova.
Aıta keteıik, Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimettiń ınflıatsııany tejeý sharalaryn atady.