Azamattardyń keıbir usynystaryn Konstıtýtsııa jobasyna qosýǵa bolady — Baqyt Nurmuhanov

ASTANA. KAZINFORM — Konstıtýtsııa jobasynyń memlekettik tildegi mátini boıynsha atqarylyp jatqan jumys onyń orys tilindegi mátinine eleýli jáne oń yqpal etip otyr. Bul týraly Konstıtýtsııalyq reformalar jónindegi komıssııanyń 9-otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.

— Jańa Konstıtýtsııa jobasy jarııalanǵan sátten bastap Konstıtýtsııalyq komıssııaǵa túrli arnalar arqyly 4 myńnan astam usynys kelip tústi. Azamattar, ǵylymı qaýymdastyq ókilderi, quqyqtanýshylar men úkimettik emes uıymdar konstıtýtsııalyq erejelerge aıryqsha kóńil bólip otyr. Olar bolashaq Konstıtýtsııa jobasyna búkilhalyqtyq talqylaý aıasynda joǵary belsendilik tanytyp otyr. Konstıtýtsııalyq komıssııa árbir usynysty, pikir men eskertýdi muqııat zerdeleýde. Taldaý nátıjeleri kórsetkendeı, olardyń keıbireýlerin jobaǵa engizýge bolady, — dedi ol.

Onyń aıtýynsha, kelip túsken usynystar baptardyń mazmunyn tolyqtyrady, kepilderdi kúsheıtedi. Quqyqtyq normalaryn, tujyrymdaryn jetildiredi ári quqyqtyq aıqyndyq pen naqtylyq deńgeıin arttyrady.

— Konstıtýtsııa jobasynyń memlekettik tildegi mátini boıynsha atqarylyp jatqan jumys onyń orys tilindegi mátinine eleýli jáne oń yqpal etip otyrǵanyn erekshe atap ótkim keledi. Nátıjesinde jekelegen erejelelerdiń redaktsııalary qaıta qurylymdalyp, naqtylanyp jatyr, — dedi Baqyt Nurmuhanov.