Azamattardyń qaýipsizdigin qamtamasyz etetin tsıfrlyq servıster engizilip jatyr
ASTANA. KAZINFORM — Qazaqstanda shuǵyl qyzmetterdiń jumysyn jeńildetetin jáne azamattardyń qaýipsizdigin qamtamasyz etetin tsıfrlyq servıster engizilip jatyr. Bul týraly Úkimettiń baspasóz qyzmeti habarlady.
Yandex Qazaqstan bas dırektory Tımýr Shalekenov Premer-mınıstrdiń tapsyrmalaryn oryndaý sheńberinde platformalyq jumyspen qamtý boıynsha bastamalar iske asyrylyp jatqanyn atap ótti. Endi Yandex óz júrgizýshileri men kýrerleri úshin salyq agenti bolyp sanalady. Bul platforma qatysýshylarynyń mindetti áleýmettik medıtsınalyq saqtandyrýǵa (MÁMS) jáne zeınetaqy aýdarymdaryna qol jetkizýine, olardyń áleýmettik qorǵalýyn kúsheıtýge múmkindik beredi.
Sonymen qatar, Yandex azamattardyń jaılylyǵy men qaýipsizdigin arttyrýǵa baǵyttalǵan tsıfrlyq servısterdi de damytýdy jalǵastyryp jatyr.
Tımýr Shalekenov tsıfrlyq sheshimderdi memlekettiń suranystarymen jáne qazaqstandyqtardyń qajettilikterimen úndestirýdiń mańyzdylyǵyn atap ótti. Osyndaı jobalardyń biri — qosymshalarda jedel járdem kóliginiń qozǵalysyn baqylaý fýnktsııasynyń iske qosylǵany, bul shuǵyl qyzmetterdiń call-ortalyqtaryna júktemeni azaıtýǵa múmkindik beredi.
— Biz qazir árbir qazaqstandyqqa kúndelikti ómirin jaqsartýǵa kómektesetin birqatar bastamany júzege asyryp jatyrmyz. Mysaly, mamyr aıynan bastap ıAndeks qosymshalarynda jedel járdem kóliginiń qozǵalysyn baqylaý tetigin iske qostyq. Bul jedel járdem qyzmetiniń baılanys ortalyqtaryna júginý sanyn azaıtýǵa múmkindik berdi. Qazir adamdar onlaın rejımde jedel járdem kóliginiń qaı jerde ekenin kóre alady. Bul árbir qazaqstandyqtyń ómirin jaqsartýǵa qosylǵan qarapaıym bolsa da óte mańyzdy úles, — dep atap ótti ol.
Sonymen qatar, kompanııa kontentterdi jergilikti jerde ornalastyrý aıasyn keńeıtip jatyr. Endi paıdalanýshylar «Yandex.Braýzerde» segiz tilden avtomatty túrde qazaq tiline aýdarylǵan beınelerdi kóre alady.
Sondaı-aq, memlekettik qyzmetshiler úshin jasandy ıntellekt tehnologııasyn zerdeleýge arnalǵan oqytý kýrsy iske qosyldy. Kólik qaýipsizdigine erekshe nazar aýdarylyp jatyr. Qazirgi ýaqytta Yandex Kólik mınıstrligimen birige otyryp qalaaralyq marshrýttarda biryńǵaı sapa jáne qaýipsizdik standarttaryn qurý boıynsha jumys istelip jatyr.
Aıta ketelik Qazaqstan men ıAndeks yntymaqtastyǵy aıasynda jańa jobalar iske qosylatyny týraly jazǵan edik.