Azamattardyń ekologııalyq sana-sezimi ózgere bastady — Qasym-Jomart Toqaev

ASTANA. KAZINFORM — Prezıdent Respýblıka kúnine arnalǵan saltanatty jıynda «Taza Qazaqstan» aktsııasy azamattarymyzdyń ekologııalyq sana-sezimin ózgerte bastaǵanyna nazar aýdardy. Bul týraly Aqorda málim etti. 

— Elimizde «Taza Qazaqstan» jalpyulttyq aktsııasy azamattarymyzdyń, ásirese, jastardyń basym kópshiliginiń qoldaýyna ıe bolyp, tabysty júzege asyrylyp jatyr. Byltyrdan beri shamamen 2,8 mıllıon gektar jer tazartyldy, 4 mıllıonnan astam aǵash otyrǵyzyldy. Eń bastysy, azamattarymyzdyń ekologııalyq sana-sezimi, búkil bolmysy ózgere bastady. Jalpy, barlyq salada atqarylǵan jumys óz jemisin berip jatyr dep aıtýǵa bolady. Biraq biz munymen toqtap qalmaımyz, ózgeristerdi mindetti túrde jalǵastyramyz. Bıyl elimizdiń mereıi ósip, rýhy kóterilgen jyl boldy. Azamattarymyz kóptegen salada tabysqa jetti, jahandyq jarystarda top jardy. Oqýshylarymyz túrli halyqaralyq bilim dodasynan myńnan astam medal ıelendi. Úzdik sportshylarymyz, sonyń ishinde boksshylar týymyzdy bıikte jelbiretti. Daryndy jastarymyz ult ónerin jer júzine pash etip, keńinen dáriptep júr. Jahan jurty qazaqty rýhy bıik, kózi ashyq, mádenıeti biregeı, zııatker ult retinde tanýda. Bul — jyldar boıy júrgizilgen júıeli jáne tıimdi jumystyń nátıjesi. Endi osy qarqyndy báseńdetpeı, tek alǵa qaraı qadam basýymyz qajet, — dedi Prezıdent.

Aıta keteıik, buǵan deıin memleket basshysy «Ulttyq qor – balalarǵa» baǵdarlamasy óskeleń urpaq úshin jasalǵan úlken qadam ekenin aıtty.