Derbes derekter taralsa, qylmystyq jaýapkershilik jáne 5000 AEK kóleminde aıyppul qarastyrylady
ASTANA. KAZINFORM — Jańa Konstıtýtsııadaǵy derbes derekterdi zańsyz jınaýdan, óńdeýden, saqtaýdan jáne paıdalanýdan qorǵaý quqyǵyna zańmen kepildik berý normasy zańnamany damytýdyń negizine aınaldy. Bul jóninde Úkimet otyrysynda QR Jasandy ıntellekt jáne tsıfrlyq damý mınıstri Jaslan Mádıev aıtty.
— Osy normany iske asyrý maqsatynda birqatar zańnama men aktilerge ózgerister men tolyqtyrýlar engizý josparlanyp otyr. Olardyń qatarynda Ákimshilik quqyq buzýshylyq týraly kodeks, Qylmystyq kodeks, sondaı-aq Derbes derekter jáne kıberqaýipsizdik týraly zańdar bar, — dedi ol.
Mınıstrdiń sózinshe, jumys eki baǵyt boıynsha júrgiziledi.
— Birinshi baǵyt — uıymdastyrýshylyq jáne tehnıkalyq sharalar. Derbes derekterdi qorǵaýdyń zamanaýı quraldaryn, onyń ishinde derekterdi jasyrý jáne heshteýdi engizý josparlanyp otyr. Bul derekterdi tehnıkalyq turǵydan qorǵaýǵa jáne ruqsatsyz qol jetkizý kezinde olardyń jarııa bolý táýekelin tómendetýge múmkindik beredi, — dedi mınıstr.
Al ekinshi baǵyt jaýapkershilikti kúsheıtýmen baılanysty.
— Ekinshi baǵyt — jaýapkershilikti kúsheıtý. Paıdalanýshylar aldynda ashyqtyq pen jaýapkershilikti arttyrý úshin operatorlar: derbes derekterdiń tarap ketý faktileri týraly ýákiletti organǵa da, azamattardyń ózderine de habarlaýǵa, sondaı-aq derbes derekterdi óńdeýdiń bastalǵany týraly ýákiletti organdy habardar etýge mindetti bolady, — dedi J. Mádıev.
Mınıstrdiń sózinshe, derbes derekterdiń jappaı taralýy úshin qylmystyq jaýapkershilik engizý jáne ákimshilik aıyppuldyń shegin 5000 aılyq eseptik kórsetkishke (AEK) deıin arttyrý qarastyrylyp jatyr.
— Sondaı-aq azamattardyń ótinishterine jedel den qoıýdy jalǵastyramyz jáne osy saladaǵy memlekettik baqylaýdy kúsheıtemiz. Atalǵan sharalar derbes derekterdi qorǵaýdyń senimdi júıesin qalyptastyryp, olardy óńdeý kezindegi jaýapkershilikti kúsheıtedi. Bul azamattardyń tsıfrlyq servıster men memlekettik ınstıtýttarǵa degen senimin arttyrýǵa yqpal etedi, — dep túıindedi mınıstr.
Aıta keteıik buǵan deıin Oljas Bektenov el halqyn jańa Konstıtýtsııanyń qabyldanýymen quttyqtaǵanyn jazǵanbyz.