Azamattardyń aýdarymdaryna salyq salynbaıdy — UEM

ASTANA. KAZINFORM — Ulttyq ekonomıka mınıstrligi azamattardyń banktik aýdarymdaryna qosylǵan qun salyǵyna salyq salý týraly aqparattyń taralýyna baılanysty túsinikteme berdi.

— Bul rette bankter óz qyzmetteri úshin klıentterden alatyn komıssııalarǵa salyq salý (QQS) jóninde aıtyp otyrmyz. Mysaly, kartany shyǵarý úshin nemese aýdarymdar úshin bank alatyn komıssııalar. Jańa Salyq kodeksiniń jobasynda ekinshi deńgeıdegi bankterdiń qarjylyq operatsııalaryna qoldanystaǵy jeńildikti joıý jónindegi norma usynylady. Azamattar júzege asyratyn aýdarymdardyń ózine salyq salynbaıdy. Eger bir banktiń ishindegi aqsha aýdarymdary komıssııasyz júzege asyrylsa, tıisinshe mundaı jaǵdaılarda salyq salynbaıdy, — dep túsindirdi mınıstrlik.

Eske sala keteıik, jańa Salyq kodeksiniń jobasy qazir talqylaý satysynda tur. Usynylǵan normalar Parlamentte, bıznes-qoǵamdastyqpen jáne jurtshylyqpen talqylanýda. Kodekstiń sońǵy jobasy 2025 jyly qabyldanady.

Buǵan deıin habarlaǵanymyzdaı, keshe Almatyda QR Parlamenti Májilisi janyndaǵy Qoǵamdyq palatanyń kóshpeli otyrysy ótti. Onda jańa salyq kodeksi talqylandy. Shara barysynda depýtat Aıdos Sarym salyq tóleý, ony tólemeýden arzan bolýy kerek ekenin alǵa tartty.