Azamattardyń 86,3 paıyzy jańa Konstıtýtsııadaǵy mádenıet pen ǵylymǵa arnalǵan normalardy qoldaıdy — Áleýmettik zertteý

ASTANA. KAZINFORM — Fılosofııa, saıasattaný jáne din taný ınstıtýtynyń basshysy Aıgúl Sádýaqasova Konstıtýtsııalyq reforma jónindegi komıssııanyń búgingi otyrysynda Ata zańnyń jańa nusqasynda ekologııaǵa basymdyq berilgenin atap ótti.

  — Mádenıet pen bilim, ǵylym men ınnovatsııa qundylyǵy Ata zańnyń kirispesinde bekitilip, adam kapıtalynyń memleket qyzmetiniń strategııalyq baǵyty retinde tanylýy ult damýynyń jańa sapasyna jáne «aqyldy» ekonomıkaǵa Konstıtýtsııalyq irgetas qalaıdy. Ol týraly Memleket basshysy talaı aıtty da, — dedi ol.

Aıgúl Sádýaqasova sóz arasynda áleýmettik zertteýden mysal keltirdi.

— Dál osy basymdyqtyń keńinen qoldaý tapqanyna keshe ǵana jarııalanǵan áleýmettik zertteýdiń qorytyndysy kýá. Azamattardyń 86,3 paıyzy Konstıtýtsııada osy qundylyqtardyń bekitilýin qoldap daýys bergen. Bul qoǵamdyq legıtımdilikti kórsetedi. Bul normanyń mańyzdylyǵy ǵylymnyń qazirgi ınstıtýtsıonaldyq jáne qarjylyq jaǵdaıynda aıryqsha aıqyn bola túsedi. Ata zańǵa engizilgen bul norma ǵylymı zertteýler men ázirlemelerdiń bıýdjetin josparlaý joldaryn túpkilikti túrde qaıta qaraýǵa, olardyń tıimdiligin ǵylymı nátıjeler turǵysynan baǵalaýǵa zańdyq negiz qalyptastyrady, — dedi ınstıtýt basshysy.

Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.