Azamattardy qorǵaý — zańnyń sáni emes, zańnyń máni — Mádı Myrzaǵaraev
ASTANA. KAZINFORM — Konstıtýtsııalyq komıssııa qaraýyndaǵy qujat jobasynda eki túbegeıli qaǵıdalyq másele aıqyn belgilenip otyr. Bul týraly Konstıtýtsııalyq reforma jónindegi komıssııanyń úshinshi otyrysynda Respýblıkalyq advokattar alqasynyń tóraǵasy Mádı Myrzaǵaraev málimdedi.
Onyń aıtýynsha, eń aldymen adam quqyqtary týraly bólimde ustalǵan, kúdikke ilingen nemese aıyp taǵylǵan árbir adamnyń advokattyń kómegin paıdalanýǵa quqyǵy bar ekeni naqty jazylýy kózdelgen.
— Bul — adam taǵdyry tarazyǵa túsken alǵashqy sátten bastap iske qosylatyn adam quqyǵyn qorǵaýdyń naqty tetigi bolady. Sondaı-aq, usynylǵan qujat jobasynda advokatýranyń mártebesi jeke ınstıtýt retinde bekitiletindigi aıtylyp otyr, — dep atap ótti ol.
Mádı Myrzaǵaraevtyń túsindirýinshe, bul advokatýranyń árbir adamnyń sot arqyly qorǵaný quqyǵyn iske asyrýyna jáne zań kómegin alýyna járdemdesetin qurylym retinde tanylatyndyǵyn bildiredi.
— Azamattardy qorǵaý — zańnyń sáni emes, ol zańnyń máni. Osy tusta aıta keter bir jaıt bar. Ózderińizge belgili, Komıssııa quramynda advokatýranyń eki ókili bar: men jáne belgili advokat, quqyq qorǵaýshy Aıman Omarova. Bul usynystardy biz birlese otyryp pysyqtadyq. Bul máselege kásibı múdde turǵysynan emes, elimizdegi adam quqyqtaryn qorǵaý tetikterin odan ári jetildirý qajettigi turǵysynan qaradyq. Sonymen qatar, biz óz kózqarasymyzben ǵana shektelgen joqpyz. Áriptesterimizben, óńirlik advokattar alqalarynyń basshylarymen, tájirıbeli advokattarmen keńestik. Quqyq normalaryn kúndelikti tájirıbede qoldanatyn adamdarmen pikir almasyldy, — dedi Respýblıkalyq advokattar alqasynyń tóraǵasy.
Onyń aıtýynsha, júrgizilgen talqylaýlar bul kepildikti qoǵam kópten kútip júrgenin jáne mundaı jańa konstıtýtsııalyq normanyń ómirde shyn máninde qajet ekenin kórsetken.
— Osydan eki aı buryn Respýblıkalyq advokattar alqasy tóraǵasynyń saılaýy ótti. Bul qyzmetke on bes úmitker talasty. Olardyń barlyǵynyń derlik saılaýaldy baǵdarlamasynda bir ortaq oı boldy. Ol — advokatýra mártebesin konstıtýtsııalyq deńgeıde bekitý. Munyń ózi, kásibı qaýymdastyq ishinde osyndaı konstıtýtsııalyq normaǵa degen suranys pisip jetilgenin kórsetedi, — dep atap ótti Mádı Myrzaǵaraev.
Sonymen qatar ol atalǵan ózgeristerdi adam quqyqtaryn qorǵaý isindegi alǵa jasalǵan mańyzdy qadam ári túbegeıli betburys retinde baǵalady. Onyń sózinshe, qujat jobasynda bul normalardyń kórinis tabýy Komıssııa músheleriniń máselege tereń ári jaýapkershilikpen qaraǵanyn ańǵartady.
— Bul — jaı ǵana redaktsııalyq sheshim emes. Adam quqyqtaryn qorǵaýdaǵy shynaıy ınstıtýtsıonaldyq tańdaýdyń belgisi. Advokattyq qaýymdastyq atynan Komıssııa múshelerine osy ustanymdary men qoldaýlary úshin shynaıy rızashylyǵymdy bildiremin. Joba mátininde usynystardyń naqty kórinis tabýy — ózara senimniń, kásibı dıalogtyń nátıjesi dep bilemin, — dep túıindedi Mádı Myrzaǵaraev.
Buǵan deıin Konstıtýtsııada advokatýranyń mártebesi jeke bappen bekitiletinin jazǵanbyz.