Prezıdent deklaratsııalaýǵa qatysty máseleni jan-jaqty pysyqtaýdy tapsyrdy

ASTANA. KAZINFORM – Kelesi jyly taǵy 8 mıllıonǵa jýyq adam deklaratsııa tapsyrady. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.

«Barlyq saladaǵy jumystyń ashyq bolýyna kóńil bólip otyrmyz. Osy oraıda azamattarymyzdyń tabysyn jappaı deklaratsııalaýdyń mán-mańyzy zor. Bul talap 2021 jyldan beri birtindep engizilip jatyr. Alǵashqy úsh kezeńde 4 mıllıonnan astam adam deklaratsııa tapsyrdy. Olardyń qatarynda memlekettik qyzmetshiler, kvazımemlekettik sektordaǵy basshylar, kásipkerler jáne osy sanatqa kiretin azamattardyń jubaılary bar», - dedi Prezıdent.

Memleket basshysy kelesi jyly taǵy 8 mıllıonǵa jýyq adam deklaratsııa tapsyratyndyǵy josparlanyp otyrǵanyn aıtty.

«Alaıda bir máseleni eskerý qajet. Jappaı deklaratsııa tapsyrý tujyrymdamasy osydan 14 jyl buryn qabyldanǵan. Sodan beri elimizde tsıfrlandyrý isi jáne fınteh salasy qarqyndy damyp kele jatyr. Túrli memlekettik mekemelerge ortaq málimetter bazasy paıda boldy. Qarjy jáne salyq baqylaýy kúsheıdi. Demek osyndaı aýqymdy ózgeristerden keıin tórtinshi, ıaǵnı, sońǵy kezeńde azamattardy deklaratsııa tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet», - dedi Memleket basshysy.