Azamattar jalǵan kredıtterden qalaı qorǵalady

ASTANA. QazAqparat –Májilis depýtattarynyń saýalyna jaýap bergen Qarjy naryǵyn retteý jáne damytý agenttigi tóraǵasynyń mindetin atqarýshy Nurlan Ábdirahmanov azamattar jalǵan kredıtterden qalaı qorǵalatyndyǵyn aıtty, dep habarlaıdy QazAqparat tilshisi.

«2021 jylǵy naýryzdan bastap agenttik barlyq mıkroqarjy uıymdaryn (budan ári – MQU) mıkrokredıtter berý kezinde klıenttiń shynaıylyǵyn naqty tekserýdi jáne rastaýdy, onyń derekterin ótinimde kórsetilgen derektermen salystyrýdy, klıenttiń naqty bıometrııalyq derekteriniń jeke basyn kýálandyratyn qujattarda kórsetilgen derekterge sáıkestigin qamtamasyz etýge, sondaı-aq klıenttiń mıkrokredıt alýǵa bildirgen erkin tirkeýge mindettedi», - dep atap ótedi ol jaýabynda.

Onyń aıtýynsha, endi mıkrokredıtti qashyqtan alý úshin qaryz alýshyny myna úsh tásildiń birimen ıdentıfıkatsııalaý júrgiziledi:

1) elektrondyq-tsıfrlyq qoltańba arqyly;

2) Ulttyq banktiń Qazaqstannyń bankaralyq esep aıyrysý ortalyǵy Identıfıkattaý derekterin almasý ortalyǵy servısin paıdalana otyryp qaryz alýshynyń bıometrııalyq ólshemderine sáıkestigi;

3) qaryz alýshynyń jeke derekterin jáne beınesin naqty ýaqyt rejıminde eki faktorly tekserý arqyly.

«Búgingi tańda Ulttyq banktiń Qazaqstannyń bankaralyq esep aıyrysý ortalyǵy Identıfıkatsııalaý derekterin almasý ortalyǵy júıesine mıkrokredıtterdi elektrondyq tásilmen berýdi júzege asyratyn barlyq MQU qosylǵan.

«Azamattardyń quqyqtaryn jalǵan kredıtterden qorǵaý maqsatynda Agenttik MQU úshin alaıaqtyq mıkrokredıt boıynsha syıaqy esepteýdi toqtata turý jáne talap-aryz jumysyn toqtatý boıynsha talaptar engizdi. Qaryz alýshylar resimdelgen jalǵan mıkrokredıtter boıynsha olardyń bereshegin sot sheshiminiń negizinde esepten shyǵarý boıynsha MQU-ǵa qoıylatyn talap normatıvtik túrde belgilendi», - dedi Nurlan Ábdirahmanov.