Azamattar úı kezegin 10-15 jyldap kútpeýi kerek – Qanat Sharlapaev

Ónerkásip jáne qurylys mınıstri Qanat Sharlapaev eldegi turǵyn úı kezegine qatysty pikir bildirdi, dep habarlaıdy QazAqparat tilshisi.

«Birinshiden, qaıtys bolǵandar týraly. Olardyń úı kezeginde turǵany anyqtaldy. Bul fakt tekserýdi qajet etedi. Mysaly, eger adam qaıtys bolsa, onyń úı kezegi zańdy túrde muragerine beriledi. Úı kezegin ońtaılandyrý maqsatynda ótken aptada Úkimet zańnamaǵa túzetýler engizip, olar Májiliske jiberildi. Sondaı-aq, bizdiń mınıstrlik úı kezegin basqarý protsesin ulttyq damý ınstıtýtyna berýdi josparlap otyr», - dedi Qanat Sharlapaev Úkimet otyrysynan keıin ótken baspasóz máslıhatynda.

Buǵan deıin Ónerkásip jáne qurylys mınıstrligi qujattardy tapsyrý kezinde qatelik jibergen 233 myń adam turǵyn úı kezeginen shyǵarylatynyn habarlaǵan edi.

«Qazir eń kóp talqylanatyn nusqa – «Otbasy banki». Úı kezegi boıynsha ákimshilikpen aınalysady. Bul kezekke turý protsesi tolyǵymen tsıfrlandyrylady. Biz turǵyn úıdi kezekte turǵandarǵa taratatyn turǵyn úı komıssııalary sııaqty barlyq sheshimderden bas tartqymyz keledi. Túsinikti ári naqty erejelerdiń bolǵanyn qalaımyz. Mysaly, biz qabyldaıtyn túzetýlerdiń biri adamdardyń 20 jyl turǵyn úı kezeginde turmaýy. Kelesi bir túzetý bir jyl ishinde aldymen basym toptardy turǵyn úımen qamtý. Adamdar úı kezegin 10-15 jyldap kútpeýi kerek», - deıdi vedomstvo basshysy.