Azamattar ustanatyn qundylyqtardy Konstıtýtsııaǵa jazdyq — Únzıla Shapaq
ASTANA. KAZINFORM — Zań ǵylymdarynyń doktory Únzıla Shapaq Jibek Joly telearnasynyń «Búgin LIVE» baǵdarlamasynda jańa Konstıtýtsııa ómirdegi barlyq qarym-qatynasty retteý normalaryn qamtıtynyn aıtty.
— Sýdıalar sottyń sheshimin, úkimin shyǵarǵanda, Konstıtýtsııanyń qaı normasyn qoldanyp otyrǵanyna silteme jasaýy kerek. Sebebi, jańa Konstıtýtsııa bizdiń ómirimizdegi barlyq qarym-qatynasty retteýge baǵyttalǵan, — dedi ol.
Sonymen birge, jańa Ata zańda ulttyq, dástúrli jáne Qazaqstan halqy ustanatyn qundylyqtar jazylǵan.
— Zaman qubylmaly bolyp tur. Qubylmaly zamanda qundylyqtar da qubylmaly bolyp otyr. Bizdiń qoǵamdy ylǵı da «Nege qundylyq joq? Nege ıdeologııamyz durys emes?» degen suraqtar týyndaıdy. Biz 30 jylda qalyptasqan uǵymdardyń barlyǵyn júıelep, qazirgi zamanǵa saı keletin, azamattar ustanatyn qundylyqtardy Konstıtýtsııaǵa jazdyq. Onyń ishinde ulttyq, dástúrli qundylyqtarmen birge, birtutas Qazaqstan halqynyń qundylyqtary da bar, — dedi Únzıla Shapaq.
Odan bólek, azamattar óz quqyǵyn qorǵaı alýy úshin Konstıtýtsııanyń mánin túsinýi shart.
— Basty quqyqtarymyz ben bostandyqtarymyz naqty jazyldy. Ár bapta solardyń qorǵalý mehanızmderi qamtyldy. Sondyqtan sýdıa da, prokýror da, advokat ta, qarapaıym azamat ta Konstıtýtsııada qorǵalatyn basty qundylyq onyń quqyǵy ekenin bilip, túsinýi kerek, — dedi zań ǵylymdarynyń doktory.
Aıta keteıik, buǵan deıin jańa Konstıtýtsııa halyq bıligin kúsheıtetinin jazǵanbyz.
