Azamattar urlanǵan 125 qarýdy óz erikterimen tapsyrdy

NUR-SULTAN. QazAqparat – Azamattar qańtar oqıǵasy kezinde urlanǵan 125 qarýdy óz erikterimen tapsyrdy. Bul týraly ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Buryn Bas prokýratýranyń ókilderimen birlese otyryp, urlanǵan qarýdyń aýyr jáne asa aýyr qylmystardy jasaý kezinde qoldanylýy múmkin ekendigin, halyqtyń ómiri men densaýlyǵyna qaýip tóndiretinin birneshe ret habarlaǵan bolatynbyz. Osyǵan baılanysty qarýdy óz erkimen tapsyrýǵa qatysty qarqyndy túsindirý jumysyn júrgizdik. Nátıjesinde azamattar qarýdyń 125 birligin tapsyrdy», - dedi Sanjar Ádilov Ortalyq kommýnıkatsııalar qyzmetindegi brıfıng barysynda.

Departament bastyǵy tek urlanǵan qarýdy ǵana emes, sondaı-aq zańsyz saqtaýdaǵy jáne tirkelmegen qarýdyń barlyq túrin tabý men tárkileý jedel is-sharalary belsendi jalǵasyp jatqanyn aıtty.

«Qabyldanǵan is-sharalardyń arqasynda búgingi tańda polıtseıler 1 460 qarý men 35 myńnan astam oq-dárini taýyp, tárkiledi», - dedi ol.