Azamattar referendýmda jańa Konstıtýtsııa jobasyn qoldap jatsa, elimizdiń saıası qurylymy túbegeıli ózgeredi – Prezıdent
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda referendýmǵa shyǵarylǵan Konstıtýtsııa jobasynda jańa bir palataly Quryltaıdyń depýtattary proportsııaly ókildik júıe negizinde saılanady dep kórsetilgenin atap ótti.
– Bul qadam saıası partııalardyń rólin kúsheıtip, zań shyǵarý jumysynyń sapasyn arttyratyny kúmánsiz. Mundaı ustanym ozyq halyqaralyq tájirıbege tolyq saı keledi. Biz kóptegen memleketterdiń proportsııaly saılaý júıesine kóship jatqanyn kórip otyrmyz. Damyǵan elderde de osyndaı júıe bar. Sebebi bul tásil óz tıimdiligin kórsetti. Konstıtýtsııa jobasyn ázirleý kezinde keıbir partııa barlyq deńgeıdegi máslıhattardy da osy júıemen jasaqtaýdy usyndy. Biraq meniń bul máselege qatysty kózqarasym – naqty. Aımaqtarda majorıtarlyq, ıaǵnı bir mandatty júıe saqtalady. Bul – óte mańyzdy. Sebebi dál osy máslıhat depýtattary jergilikti jerde saılaýshylarmen únemi baılanysta bolyp, qoıan-qoltyq jumys isteıdi. Sonymen birge mundaı júıe eshqandaı partııaǵa kirmeıtin, biraq halyq senetin isker azamattar úshin taǵy bir tıimdi saıası baspaldaq bolmaq. Sol arqyly máslıhattardyń róli arta túsedi, - dedi Memleket basshysy.
Sonymen qatar azamattar referendýmda Konstıtýtsııa jobasyn qoldap jatsa, elimizdiń saıası qurylymy túbegeıli ózgeretinin aıtty.
– Biz múldem jańa konstıtýtsııalyq úlgige nemese modelge kóshemiz. Bul qadam proportsıonaldyq jáne majorıtarlyq júıe arasyndaǵy tepe-teńdikti qamtamasyz etedi. Buǵan qosa, saılaý úderisin barynsha júıelep, saılaýǵa túsetin azamattardyń jaýapkershiligin arttyra túsedi. Osylaısha, máslıhattar Quryltaıǵa qajetti bilikti mamandar daıarlaýǵa belsendi túrde atsalysady. Aýqymdy reformalardy sapaly júzege asyrý úshin meılinshe tıimdi ári kásibı zań shyǵarý qyzmetin jolǵa qoıýymyz kerek. Al elimizdegi ókildi bılik júıesiniń negizi aımaqtarda qalyptasady. Sondyqtan máslıhattardyń qyzmeti aıryqsha mańyzdy ekenin únemi este ustaǵan jón. Sebebi jurt óz máselesin eń aldymen depýtattarǵa aıtady. Al halyqtyń senimin aqtaýdan artyq abyroı joq. Túptep kelgende, depýtat bolý – el adamy bolý degen sóz. Bul – mártebesi bıik, jaýapkershiligi zor qyzmet. Ult múddesin bárinen bıik qoıyp, el ıgiligi úshin eńbek etetin azamattar naǵyz depýtat degen atqa laıyq, osyndaı azamattar mindetti túrde halyqtyń senimi men qurmetine ıe bolady, - dedi Prezıdent.
Depýtat halyqtyń senimine syzat túsiretin áreketten aýlaq bolýy qajet ekenin atap ótti. Óıtkeni mundaı áreket búkil memlekettik apparattyń, tutas bılik júıesiniń bedeline nuqsan keltiredi.
– Sizder osy jaýapkershilikti durys túsinip, tereń sezinip, qyzmetterińizdi adal atqara beresizder dep kámil senemin, - dedi Qasym-Jomart Toqaev.
Memleket basshysy barlyq deńgeıdegi bılik ókilderi halyqpen ashyq ári túsinikti áńgime, suhbat ornata bilýi kerek ekenin aıtty.
