Azamattar óziniń áleýmettik mártebesin endi Egov portaly arqyly teksere alady
ASTANA. QazAqparat - Azamattar mindetti medıtsınalyq saqtandyrý sheńberindegi óziniń áleýmettik mártebesin endi Egov portalynda teksere alady, dep habarlaıdy «Ulttyq aqparattyq tehnologııa» AQ baspasóz qyzmeti.
Ol úshin óziniń JSN-in kórsetý jetkilikti. Qyzmet kórsetý aıasynda suraý salýshyǵa «Jaldamaly jumysshy», «Áleýmettik tólem alýshy», «18 jasqa deıingi balalar», «Ózin-ózi jumyspen qamtýshy retinde tirkelgen (JK, ShQ)» áleýmettik mártebeleriniń bireýi kórsetilgen habarlama jiberiledi, eger azamat JK nemese jumysshy retinde tirkelmegen bolsa - «Anyqtalmaǵan statýs» degen habarlama shyǵady.
Sonymen qatar áleýmettik mártebeni anyqtaý kezinde, áleýmettik medıtsınalyq saqtandyrý júıesine aı saıynǵy tólemder men aýdarymdardy ótkizetin tulǵa týraly aqparat shyǵady. Osylaı, mártebesi «Áleýmettik tólem alýshy», «18 jasqa deıingi balalar» retinde anyqtalǵan tulǵalar úshin áleýmettik medıtsınalyq saqtandyrý júıesine aı saıynǵy tólemder men aýdarymdardy Memleket ótkizetin bolady.
«Jaldamaly jumysshy» mártebesi bar tulǵalar úshin áleýmettik medıtsınalyq saqtandyrý júıesine aı saıynǵy tólemder men aýdarymdardy 2017 jyldyń 1 shildesinen bastap jumys berýshi ótkizetin bolady.
Áleýmettik mártebesi «Ózin-ózi jumyspen qamtýshy retinde tirkelgen (JK, ShQ)» retinde anyqtalǵan tulǵalar 2017 jyldyń 1 shildesinen bastap áleýmettik medıtsınalyq saqtandyrý júıesine aı saıynǵy tólemder men aýdarymdardy ózdiginen ótkizetin bolady jáne bul rette aı saıynǵy tólemder mólsheri eń tómen jalaqynyń 2 eselengen mólsheriniń 5%-yn quraıdy. 2017 jyly tólem mólsheri aıyna 2446 teńgeni quraıdy.
