Azamattar men sheteldikterdiń kóleńkeli kirisin anyqtaýdyń jańa júıesi engiziledi

ASTANA. KAZINFORM — Kóleńkeli ekonomıkany anyqtaý ádistemelerine ózgerister engizildi. Endi olar jasyryn kiristerdi dálirek anyqtaýǵa múmkindik beredi jáne zańsyz bıznestiń jańa nysandaryn eskeretin bolady. Bul týraly Joǵary aýdıtorlyq palatanyń baspasóz qyzmeti habarlady. 

Keshendi sharalar Joǵary aýdıtorlyq palatanyń nusqamasy boıynsha qabyldandy.

Joǵary aýdıtorlyq palata ótken jyldyń sońynda kóleńkeli ekonomıkaǵa qarsy kúres boıynsha memlekettik saıasattyń tıimdiligine aýdıt júrgizdi. Tekserý barysynda jasyryn jáne zańsyz kiristerdi esepteýdiń qoldanystaǵy ádistemeleri eskirip, kóleńkeli aqshanyń kóptegen naqty kózin eskermeıtini anyqtaldy. Osyǵan baılanysty Ulttyq statıstıka bıýrosyna olardy qaıta qaraý tapsyryldy.

Nátıjesinde baqylanbaıtyn ekonomıkany baǵalaý ádistemesi jańartyldy. Buryn ol bilim berý, densaýlyq saqtaý jáne bos ýaqyt ótkizý salalaryn tolyq qamtymaǵan. Endi osy baǵyttardy esepteý algorıtmderi ózektilendirilip, tolyqtyryldy.

Sonymen qatar:

— taýarlardy qaıta satý úshin ákeletin jeke tulǵalardyń;

— mal ósirýmen, et satýmen, kartop jáne maıly daqyldar ósirýmen aınalysatyn aýyl sharýashylyǵy taýarlaryn óndirýshilerdiń;

— demalys jáne oıyn-saýyq uıymdastyrý, kólik jýý boıynsha qyzmet kórsetetin kásipkerlerdiń;

— QR aýmaǵynda tabys tabatyn shetel azamattarynyń jasyryn kirisin esepke alýdyń jańa tásilderi engizildi.

Munyń bári resmı statıstıkaǵa túspeıtin kiris kólemin dál baǵalaýǵa múmkindik beredi.

 Sonymen qatar zańsyz qyzmet kólemin baǵalaý ádistemesine kóptegen ózgeris engizildi. Jańa faktorlar eskerilip, kemshilikter túzetildi:

— tyıym salynǵan zattardyń qoldanystaǵy tizbesi boıynsha sıntetıkalyq esirtki aınalymynyń esebi qaıta qaraldy;

— esirtkige táýeldiler sany týraly derekkózder naqtylandy;

— esirtki taýarlaryn óndirý esebi qaıta qaraldy;

— zańsyz aǵash kesý, brakonerlik jáne balyq óndirisi boıynsha sanaý formýlalary túzetildi;

— kontrafakti, qoldan jasalǵan taýarlar jáne pırattyq kóshirmeler boıynsha derekkózder naqtylandy.

— Shaǵyn kásiporyndar boıynsha derekter jınaýdy túzetý baǵyty jeke qaraldy. Buryn olardyń avtomobıl satý men jóndeý salasyndaǵy qyzmeti iriktelip esepke alynǵan, endi statıstıka tolyǵymen jınalady. Bul baqylanbaıtyn ekonomıkany esepteýde jol beriletin burmalaýdy joıý úshin qajet.

Qabyldanǵan ózgerister memleketke kóleńkeli ekonomıkanyń aýqymyn dálirek baǵalaýǵa múmkindik beredi. Jańa derekterdiń negizinde ýákiletti memlekettik organdar anaǵurlym ýaqytyly jáne tıimdi sharalar qabyldaı alady, — delingen habarlamada.

Memlekettik aýdıt qorytyndylary boıynsha berilgen basqa tapsyrmalardyń oryndalýy baqylaýda bolady.