Azamattar kez kelgen normaǵa qarsy bolsa, Konstıtýtsııalyq Sotqa júginetin bolady – Senat tóraǵasy

NUR-SULTAN. QazAqparat – QR Parlament Senatynyń tóraǵasy Máýlen Áshimbaev QR Prezıdent teleradıo keshenine bergen suhbatynda 5 maýsymda ótetin referendýmǵa shyǵarylǵan Konstıtýtsııalyq Sot týraly normalardyń mańyzyna toqtaldy. Senattyń jumysyn qalaı jandandyratynyn túsindirdi, dep habarlaıdy QazAqparat tilshisi.

«Konstıtýtsııalyq reformanyń aıasynda memleket pen qoǵamnyń arasyndaǵy qarym-qatynastyń jańa kezeńi ashylyp jatyr dep aıtsaq artyq bolmaıdy. Mysaly, naqty normalardy aıtaıyq. Búginde azamattar memlekettik organdardyń buıryqtaryna nemese zań normalaryna, memlekettiń naqty bir sheshimderine narazy bolsa, ol normalar múddemizge qaıshy keledi degen pikir týyndap jatsa, jalpy ótinishter sııaqty sotqa berý kerek. ıAǵnı, protsedýrasy uzaq. Qazir osy reformalardyń aıasynda Konstıtýtsııalyq Sot qurylyp jatyr», - dedi Senat tóraǵasy.

Senat spıkeriniń aıtýynsha, jalpy usynylyp otyrǵan konstıtýtsııalyq reforma halyq pen bılik arasyndaǵy qarym-qatynastyń jańa formatyna jol ashpaq.

«Konstıtýtsııalyq Sottyń negizgi fýnktsııasy azamattardyń bılik ókilderiniń sheshimderine narazylyǵyna sot retinde baǵasyn berý, sheshim qabyldaý. Osyndaı basqa da kóptegen normalar bar», - dedi Máýlen Áshimbaev.

Aıta keteıik, búgin «Evrazııa» arnasynda saǵat 10:00-de, «Habar» - 12:45-te, «Qazaqstan» - 16:05-te, «Qazaq TV» - 20:15-te, «Almaty»- 20:35-te referendým týraly derekti fılm kórsetilip jatyr.