Azamattar endi ótinimderiniń oryndalý barysyn «TsON» mobıldi qosymshasy arqyly baqylaı alady

ASTANA. KAZINFORM – Memlekettik qyzmetterdi tsıfrlandyrý úderisi aıasynda «Azamattarǵa arnalǵan úkimet» memlekettik korporatsııasy «TsON» mobıldi qosymshasyna jańa múmkindik qosty. Endi azamattar memlekettik qyzmetke bergen ótinimderiniń mártebesin naqty ýaqyt rejıminde kóre alady.

Ótinim mártebesin kórý úshin qoldanýshy qosymshadaǵy «HQKO qyzmetteri» nemese «Arnaıy HQKO qyzmetteri» bólimin tańdap, ótinim nómirin engizýi kerek. Bul jańashyldyq qyzmet kórsetý protsesin barynsha ashyq etip, azamattarǵa ótinimniń qaı satyda turǵanyn jáne nátıjeni qashan alýǵa bolatynyn naqty bilýge múmkindik beredi. Eń bastysy – endi ótinim mártebesin bilý úshin HQKO-ǵa barýdyń qajeti joq.

Jańa fýnktsııa azamattardyń ýaqytyn únemdep, memlekettik qyzmetterge degen senimdi arttyrady. Ár qoldanýshy óz ótiniminiń qaralý kezeńin kórip, kez kelgen ózgeris týraly jedel habardar bola alady.

– Ótinim mártebesin baqylaý júıesin engizý – memlekettik qyzmetterdi jańǵyrtýdyń mańyzdy qadamy. Bul sheshim ashyqtyqty arttyryp, halyqqa qyzmet kórsetýdiń qolaılylyǵyn kúsheıtedi. Mundaı tsıfrlyq bastamalar Prezıdent Joldaýynda aıtylǵan tsıfrlyq transformatsııa mindetterimen úndesip, memlekettik qyzmet sapasyn jańa deńgeıge kóteredi, – dedi «Azamattarǵa arnalǵan úkimet» memlekettik korporatsııasynyń basqarma tóraǵasy Arman Kenjeǵalıev.

Qosymshada sonymen birge elektrondy qolhattardy saqtaý jáne kórý múmkindigi iske qosylǵan. Bul qolhat – ótinimniń qabyldanǵanyn nemese qyzmettiń kórsetilgenin rastaıtyn resmı qujat. Ol avtomatty túrde «Tapsyrys tarıhy» bóliminde saqtalady.

Memlekettik korporatsııa aldaǵy ýaqytta da azamattarǵa memlekettik qyzmetterdi onlaın formatta jyldam ári yńǵaıly túrde usynýǵa baǵyttalǵan jańa tsıfrlyq sheshimderdi engizýdi jalǵastyrady.

Aıta keteıik, Qazaqstanda «TsON» mobıldi qosymshasyn paıdalanýshylar sany 670 myńǵa jýyqtady.

«TsON» mobıldi qosymshasynda «Kólik tarıhy» qyzmeti iske qosyldy.