Azamattar dinı bilim men málimetterdi elimiz úshin dástúrli bolyp sanalatyn aqparat kózderinen alýy mańyzdy - K. Tyshhan
ASTANA. QazAqparat - Qazirgi qoǵamymyzda aqparattyq tehnologııalardyń jetistikteri sanalatyn áleýmettik jeliler arqyly kóptegen múmkindikter ashylýda. Soǵan baılanysty qazirgi el azamattary, ásirese jastar men jasóspirimder bul qyzmetti turaqty paıdalanady. Aqparattardyń tez taraýyna muryndyq bolyp otyrǵan osy jeliler arqyly ártúrli mazmundaǵy beınerolıkter nemese úndeýler, habarlamalar da taralyp jatady.
Osy oraıda dintanýshy Keńshilik Tyshhan elimizdiń azamattaryn, qazaq jastaryn dinı ilimdi durys joldan izdeýge shaqyrdy. «Keıbir azamattar dinı mazmundaǵy aqparattardy kezdeısoq jiberse, keıbir aqparattar josparly túrde taratylady. Sol arqyly adamdar bir-birimen tanysyp, kózqarastaryn bólisip, birtekti ustanymdaǵy adamdar birigip top quryp jatady», - deıdi ol.
«Alaıda, kóptegen belgisiz aqparattar men habarlamalar azamattarymyzdyń dinı kózqarasyn qalyptastyrýǵa baǵyttalǵan. Olardyń ishinde eń belsendi taralyp otyrǵany elimiz úshin dástúrli emes bolyp sanalatyn dinı uıymdar men toptardyń, tipti ekstremıstik, teris senimdik málimetter deýge bolady. Sondyqtan qazirgi dinı jańǵyrý, dinge oralý kezeńinde keıbir azamattarymyzdyń burys baǵyttaǵy dinı kózqarasqa baıqamaı bet buryp, dindarlar arasynda kóptegen túsinispeýshilikterge, qaıshylyqtarǵa, keıde ásiredinshildik (radıkaldyq) formadaǵy qımyldarǵa sebep bolyp otyr. Osy sebepti, din jolyna, ımandylyq jolyna bet burǵysy keletin, ne bolmasa dinı saýatyn jetildirgisi keletin azamattar, jastar dinı bilim men málimetterdi elimiz úshin dástúrli bolyp sanalatyn aqparat kózderinen alýy barynsha mańyzdy», - dep atap ótti K. Tyshhan.
Onyń aıtýynsha, dinı taqyrypta senimdi ári bilikti málimetterdi taratyp otyrǵan aqparat kózderi Qazaqstan musylmandar dinı basqarmasyna tıesili saıttar men merzimdik basylymdar bolyp tabylady. Olardyń qatarynda «e-islam.kz», «muftiyat.kz», «muslim.kz», «azan.kz», «islam.kz, sııaqty beldi ınternet saıttary bar
«Dinı kózqarastarymyz ben baǵytymyzdyń senimdi aqparattardan málimet alýy, dinı birtutas pikirimizdiń qalyptasýy elimizdiń rýhanı turaqtylyǵy men birligi úshin, ári rýhanı qaryshtap damýymyz úshin asa mańyzdy bolyp tabylady. Sondyqtan árbirimiz ózimizge, senimimizge, otbasymyzǵa, jaqynymyzǵa jaýapkershilikpen qaraıyq», - deıdi dintanýshy Keńshilik Tyshhan.
