Azamattar Ákimshilik rásimdik-protsestik kodekstiń jańa qaǵıdalarymen qorǵalady – sýdıa

NUR-SULTAN. QazAqparat – 2021 jyldyń 1 shildesiden bastap Qazaqstanda Ákimshilik rásimdik-protsestik kodeks kúshine enedi. Onyń azamattarǵa ne beretinin Nur-Sultan qalasy Saryarqa aýdandyq sotynyń sýdıasy Saltanat Shámshinurova túsindirdi, dep habarlaıdy QazAqparat tilshisi.

«Ákimshilik ádilettiń negizgi mindeti – azamattardyń quqyqtary men bostandyqtaryn, tipti memlekettik organnyń da zańsyz áreketterinen qorǵaý. Azamattar kodekstiń jańa qaǵıdattary arqyly qorǵalatyn bolady. Zańnamanyń keıbir túsiniksiz tustary azamattyń paıdasyna qaraı túsindiriledi (quqyqtardyń basymdyǵy qaǵıdaty). Azamat qabyldanǵan ákimshilik aktiniń zańdy jáne dáıekti ekenine, al memlekettik organnyń qatesi eger onyń kinási bolmasa, zııan keltirmeıtinine senimdi bolýy kerek», - dedi Saltanat Shámshinurova.

Kodeks aıasynda memlekettik organmen daýlar kezinde sot isin júrgizýdiń jańa ákimshilik túri engiziledi. Sýdıa sot isin júrgizýdiń jańa túri qaıda baǵyttalǵanyn túsindirdi.

«Sot isin júrgizýdiń jańa tórtinshi túriniń ereksheligi – budan bylaı talap-aryzdar «Memlekettik organnyń kinálilik prezýmtsııasy» qaǵıdaty boıynsha qaralady, ol óz sheshiminiń, is-áreketiniń nemese áreketsizdiginiń zańdylyǵy men negizdiligin dáleldeýi tıis. Munda azamattyń sheshimmen kelispeý týraly sotqa júginýi jetkilikti. Sot aryzdanýshyǵa talaptardy durys tujyrymdaýǵa, formaldy qatelerdi joıýǵa, is boıynsha obektıvti shyndyqty anyqtaý úshin shara qabyldaýǵa jáne óz sheshiminiń oryndalýyn baqylaýǵa kómektesedi», - dep túsindirdi S. Shámshinurova.

Eske sala keteıik, 2020 jyly 29 maýsymda Memleket basshysy Qazaqstan Respýblıkasynyń Ákimshilik rásimdik-protsestik kodeksine qol qoıdy. Ol 2021 jylǵy 1 shildeden bastap qoldanysqa engiziledi.