Azamattar 600-den astam atys qarýyn óz erkimen polıtsııaǵa tapsyrdy

ASTANA. QazAqparat – Azamattar polıtsııaǵa 600-den astam atys qarýyn óz erkimen tapsyrdy. Bul týraly Іshki ister mınıstrligi baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Іshki ister mınıstrliginiń jyl saıyn ótkizetin zańsyz saqtalǵan atys qarýyn, oq-dárilerdi jáne jarylǵysh zattardy halyqtan satyp alý aktsııasy jalǵasýda. Ol 10-sáýirde bastaldy. Bul maqsattarǵa respýblıkalyq bıýdjetten 88 mln teńgeden astam qarjy bólindi. Eki apta ishinde ishki ister organdaryna 488 azamat júgindi. Olar 600-den astam atys qarýyn, 2,5 myńnan astam oq-dárini óz erkimen tapsyrdy», - dedi Shuǵyla Turlybek vedomstvonyń baspasóz qyzmeti alańynda ótken brıfıngte.

Mınıstrlik ókiliniń aıtýynsha, qarý-jaraq zattaryn erikti túrde tapsyrǵany úshin respýblıkalyq bıýdjetten qarýdyń tehnıkalyq jaǵdaıyna baılanysty onyń árbir birligi úshin 34 myńnan 345 myń teńgege deıingi somada tólem kózdeledi.

«Qarý-jaraq qabyldaý árbir aýmaqtyq polıtsııa organynda júrgiziledi», - dedi ol.