Azamathan Ámirtaı Qazaqstandaǵy ekologııalyq qaýipti problemalardy atady
Bul týraly búgin Astanada «Baıtaq bolashaq alıansy» qoǵamdyq birlestigi (QB) uıymdastyrǵan baspasóz máslıhatynda atalmysh QB tóraǵasy Azamathan Ámirtaı aıtty, dep habarlaıdy QazAqparat tilshisi.
«Biz Astana, Almaty jáne barlyq oblystyń ákimdikterinde kezdesýler ótkizdik. Barlyǵymen memorandýmdar jasadyq. Jıyndarda aımaqtardyń ekologııalyq máselelerine toqtalyp, ózektilerin kún tártibine dereý shyǵardyq. Biz oblystardaǵy ekologııalyq máselelerdiń túıinin sheshýde qıyndyqtar bar ekenin baıqadyq. Mysaly, Soltústik Qazaqstandaǵy 6 ýran kenishi aımaqqa óz zardabyn tıgizip otyr. Bul kenishter qazirgi ýaqytta jumys istep turmaǵanyn da atap óteıin. Aýyl sharýashylyǵy salasynda da qıyndyqtar bar. Bizdiń fermerler tyńaıtqyshtardy durys qoldana bermeıdi. Osynyń saldarynan jerdiń qunarlylyǵy kemip, tozańdanýǵa ákelip soqtyrady. Mańǵystaý oblysyndaǵy «óli teńiz» atalyp ketken kólge áli kúnge deıin eshkim mán bermeıdi. Sheteldik ǵalymdar bul kóldiń zııandy ekenin aıtyp otyr. Al Óskemen qalasynda radıoaktıvti qaldyqtar kómilgen shuńqyrdyń ústinen balabaqsha salǵan. Mundaı mysaldardy kóptep keltire alamyz. Taza aýa máselesine kelsek, Almaty, Shymkent, Jezqazǵan qalalarynyń aýasy óte las», - dedi ol.
Atalǵan problemalardy sheshý úshin «Baıtaq bolashaq alıansy» qoǵamdyq birlestigi úkimetpen birlesip jumys jasamaq.
«Qazaqstanda jyl saıyn 22 mlrd tonna kóleminde shıkizat qaldyqtary aýany lastaıdy. Munyń ishinde túrli-tústi metallýrgııa salasynyń úlesi basym. Sondyqtan jasyl ekonomıkaǵa kóshýge degen qadamdardy quptaımyn. Ekologııany lastaý, oǵan mán bermeý úlken zardapqa ákelip soqtyrady. Bizdiń alıans músheleri osy máselelerge qoǵamnyń nazaryn aýdarǵysy keledi. Biz bul oraıda Úkimetpen tyǵyz baılanys ornatyp, ekologııany lastaýdyń aldyn alý úshin tıimdi sharalar qarastyratyn bolamyz», - dep atap ótti Azamathan Ámirtaı.
