Azamathan Ámirtaev: Prezıdenttiń ekologııa máselesine nazar aýdarǵany - ekologter úshin úlken qoldaý

NUR-SULTAN. QazAqparat - Búgin ótken Úkimettiń keńeıtilgen otyrysynda Prezıdent Qasym-Jomart Toqaevtyń málimdemelerine qatysty «Baıtaq bolashaq» ekologııalyq alıansynyń dırektory Azamathan Ámirtaev pikir bildirdi, dep habarlaıdy QazAqparat tilshisi.

«Búgin bolǵan Úkimettiń keńeıtilgen otyrysynda Prezıdent Qasym-Jomart Toqaev ekologııa máselesine de úlken nazar aýdardy. Sońǵy kezderi pandemııa, ekonomıkalyq daǵdarys dep júrip ekologııa týraly umytylyp ketken edi. Qoqystyń qaıta óńdelmeı jatqany búgingi kúni Qazaqstandaǵy óte ózekti máseleniń biri. Turmystyq qaldyq polıgondarynyń qojaıyndary bar. Olar úlken olıgarhtar, biraq olardyń polıgonyndaǵy qoqys kólemi azaıýdyń ornyna kóbeıip jatyr. Olar bólingen qarjyny qaıta óńdeýge jumsamaı, qaltalaryna salyp otyr. Osy másele áli kúnge deıin sheshilgen joq», - deıdi «Baıtaq bolashaq» ekologııalyq alıanstyń dırektory Azamathan Ámirtaev.

Onyń aıtýynsha, Prezıdenttiń ekologııa máselesin sheshý týraly aıtyp, nazar aýdarǵany - ekologter úshin úlken qoldaý.

«Prezıdenttiń osy máseleni kótergenine óte qýandyq. Endi bul is júzinde iske asýy kerek. Ekologııamyzdy túzeýimiz kerek. Tabıǵattyń qadirin bilmeýden, ekologııalyq mádenıettiń joqtyǵynan osyndaı jaǵdaı bolyp jatyr. Bul máselege osylaı fılosofııalyq turǵyda qaraı bilý kerekpiz. Prezıdenttiń ekologııaǵa qatysty málimdemesi ekologterdi qatty qýantty», - deıdi ol.