Azamat soǵysynan qazaqtaı qantógis kórgen halyq joq - Jumagúl Ábsemetova
Bıyl - qazaq tarıhynda taǵlymdy taǵdyrymen iz qaldyrǵan T.Júrgenov, І.Jansúgirov, B.Maılın, S.Qojanov, S.Seıfýllın, T.Rysqulov, T.Shonauly sııaqty qazaq zııalylarynyń 125 jyldyǵy. Elordadaǵy Ultyq mýzeı saıası qýǵyn-súrgin qurbandaryn eske alý kúninde atalmysh tulǵalardy eske alý úshin «Uly dalanyń uly tulǵalary» atty tarıhı-tanymdyq dóńgelek ústel ótkizdi.
Bir mınýt únsizdikpen bastalǵan shara barysynda ǵalymdar jas býynǵa saıası súrginniń qalaı týyndaǵanyn tarıhı derektermen túsindirdi.
«1917 jyly qazaq dalasynda bolshevıkter bılikke keldi. Alǵashqy kelgen kúnnen-aq qazaqqa qarsy saıasat ustandy. Ol úshin áýeli ultty baı-kedeı dep ekige bóldi. Tutas halyqty sıyrdyń búıregindeı búldirip, ákeni balaǵa qarsy qoıdy. Azamat soǵysynan qazaqtaı qantógis kórgen halyq joq sol jyldary. 1916 jylǵa deıin etnıkalyq quramymyz qatty búlinip qoıǵan bolatyn. Orys sharýalary men áskerı bólimder, «kazachestvo» ókilderi kóbeıgen kez. Ekonomıkalyq, rýhanı, saıası, sharýashylyq, kazaktyq otarlaý degen bes baǵyty boldy. Alty birdeı úkimet ornap, eldi qoǵadaı qyrdy. Solardan halyqty arashalaý úshin Alashorda quryldy», - deıdi ǵalym.
