Azamat Satybaldy: Teatr akteryna toı jaǵalamaı, óz isimen aınalysatyndaı jaǵdaı jasalar degen úmittemiz

NUR-SULTAN. QazAqparat – Belgili akter, Qazaqstannyń eńbek sińirgen qaıratkeri Azamat Satybaldy Prezıdenttiń mádenıet qyzmetkerleriniń aılyǵyn kóterý bastamasyna óner adamdary úlken úmitpen qarap otyrǵanyn aıtady, dep habarlaıdy QazAqparat tilshisi.

«Bul bastamany men óte sátti qadam dep qabyldadym. Qasym-Jomart Kemelulynyń óz Joldaýynda mádenıet qyzmetkerleriniń jaǵdaıyn kóterýiniń ózi – úlken jetistik, mádenıet pen ádebıetke úlken qamqorlyǵy dep bilem. Qalaı aıtsaq ta, eldiń damýynyń birden-bir kórsetkishi – mádenıet pen ádebıet. Ol sala aqsamaı, ózgemen qatar júrýi kerek. Teatrda jaǵdaıdyń ońaı emes ekenin bilemiz. Teatr qyzmetkerleriniń aılyǵy tómen ekeni eshkimge qupııa emes. Mine, osy kezde óner adamdarynyń aılyǵynyń ósetini jaıly Prezıdent tapsyrmasy dátke qýat boldy. Shóldegende berilgen sý ispettes óner adamdarynda úmit týdy», - dedi Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń dırektory Azamat Satybaldy.

Dese de, Azamat Satybaldynyń aıtýynsha, mádenıet qyzmetkerleriniń máselesi jalaqymen shektelmeıdi.

«Qordalanyp qalǵan problemalar barshylyq. Meniń oıymsha, eń bastysy birinshi qadam jasaldy. Aılyqty kóteremiz dedi. Alǵashqy qadam jasalǵannan keıin de basqa da problemalarǵa nazar aýdaryla jatar. Bul jańalyqqa árbir teatral áriptesterimniń bári qýanyp jatyr. Aılyqtyń kóterilýi bir ǵana teatr qyzmetkeriniń qýanyshy emes – onyń otbasynyń jaıly jańalyǵy. Ol aqshasyn otbasyna aparady. Aılyqpen birge ol otbasynyń áleýmettik jaǵdaıy da kóteriledi. Sol úshin biz óte qýanyshtymyz. Teatrdyń aktery eshýaqytta syrtqa qaraılamaý kerek, toı-tomalaqty jaǵalamaýy tıis. Kontsertke barmaı, ónermen aınalysýy kerek», - dedi ol.

Azamat Satybaldy teatr aktery taza ónermen aınalysý úshin qaryny toq, kóılegi kók bolý kerek dep pikir bildirdi.

«Otbasynda ymyra, tynyshtyq bolýy tıis. Sol úshin aılyq kóbirek berse jaqsy bolar edi degen úmitimiz bar. Bolashaqta mádenıet qyzmetkerleriniń jaǵdaıy jasala berse quba-qup», - dedi ol.

Eske sala ketsek, kúni keshe Qazaqstan halqyna Joldaýyn jarııalaǵan Memleket basshysy Qasym-Jomart Toqaev Úkimetke mádenıet salasynyń qyzmetkerleriniń aılyǵyn kóterýdi tapsyrǵan bolatyn.

«Mádenıet qyzmetkerlerin qoldaý qajet. Biz mádenıet salasynda eńbek etetin adamdarǵa jetkilikti túrde kóńil bólmeı otyrmyz. Bul eń aldymen kitaphana, mýzeı, teatr qyzmetkerlerine qatysty másele. Olardyń eńbekaqysy sońǵy jyldary múlde kóbeıgen joq. Sonyń saldarynan mádenıet qyzmetkerleri, ásirese jas mamandar jeńildigi bar turǵyn úı baǵdarlamaryna qatysa almaıdy. Mundaı ahýal osy kásiptiń bedelin túsirip, laıyqty kadrlardyń tapshylyǵy aıqyn sezilýde», - dedi Prezıdent Qazaqstan halqyna Joldaýynda.