Azamat Satybaldy: Sahna - kerbezdikti keshirmeıdi

Aktermen oı bólisip, syrlasýǵa kelgenderdiń qarasy kóp. Aldymen tutas jetistigin jipke tizip tanystyrǵan júrgizýshiniń sózinen keıin: «Shyndyǵynda, bul meniń shyǵarmashylyǵymdaǵy bastama jetistikter bolýy kerek» dep bastaǵan sózin ári qaraı sabaqtaı kele: «Teatr - Ydyrys aǵalarymyzdan bastap, Nurmuhan, Qapan aǵalarymyzdyń mańdaıynyń teri, Sábıra, Farıda apalarymyzdyń daýysynyń úni qalǵan qasıetti meken. Qazaq óneriniń qarashańyraǵy. Eger maǵan «Siz úshin eń úlken baqyt qandaı?» degen suraq qoıylsa, árıne, oılanbastan «Áýezov teatrynda qyzmet jasaý» dep jaýap bergen bolar edim. Úshinshi kýrstan bastap osy qara shańyraqqa keldim, Allaǵa myń táýbe, sodan beri taban aýdarmastan qyzmet jasap kelemin. Baǵyma buıyrǵan rólderdi somdadym. Ras, rejısser usynǵan kez kelgen róldi somdap shedevr jasadym dep aıtpaımyn. Oń jambasyma kelgenderi, kerisinshe, minis bermegen, jan dúnıesin tolyqtaı asha almaǵan obrazdardyń da bolǵandyǵyn joqqa shyǵarmaımyn. Sondaı rólderdiń biri Muhtar Áýezovtiń Abaıy. Ol - dana. Meniń oıymda ǵulama obrazyn ashý, jetkizý múmkin emes nárse. Alǵash ról usynylǵan kezde zerttep-zerdeleı kele Ydyrys aǵa Noǵaıbaevtyń Abaı rólin 33 jasynda somdaǵanyn bilgen soń, men 30 jasymda nege oınaı almaımyn degen bir batyrlyq paıda boldy da, bul obrazdy somdaýǵa bel býdym. Biraq, ókinishke qaraı, men bul beıneni kórermenge jetkize almadym. Muhtar Áýezovtiń ózi «Abaı jolyn» jazyp bitken kezde bir jýrnalıstiń «Siz Abaıdy tutastaı zertteı alǵan shyǵarsyz» degen suraǵyna: «Qarǵam, Abaı degen dárııa, men sol dárııanyń shetinen bir-aq qasyǵyn aldym» degen eken. Abaı bola almaıtynymdy túsinip, bir jyldan keıin bul rólden bas tarttym. Al kópshiliktiń ystyq-yqylasyna bólengen erekshe rólim shyǵarmashylyqtyń shalqar shabytyna órleý kezeńinde shyqqan «Qas qaǵymdaǵy» Sábıt, «Qyz muńyndaǵy» Ǵabıt, Roza Muqanovanyń «Máńgilik bala beınesinde» Qumar, «Sultan Beıbarystaǵy» Beıbarys rólin atar edim. Jan dúnıemdi ashyp, akterlyq qyrymdy jan-jaqty kórsetýge múmkindik týǵyzǵan rólderimniń kóshbasynda turǵany - Shekspırdiń Gamleti. Álemdik deńgeıdegi bul shyǵarmanyń basty obrazyn somdaý - kez kelgen akterdiń armany. Tipti, teatrdyń abyz aqsaqalyna aınalǵan Asanáli aǵanyń da suhbattaryn oqyp otyrsańyz, Gamletti oınaý armany bolǵandyǵyn baıqaısyz. Sol sııaqty Beıbarys rólin de oınaı bergen ústine oınaǵym keledi», - dedi óner ıesi.

Kıno salasyna kelgenine nebári bes-aq jyl bolǵanyn aıtqan ol bul saladan buryn teleekrannyń qyzyldy-jasylyna elitip, jeńil tanymaldylyqqa ıe bolyp juldyz bolǵysy kelgendigin de jasyrmady. Biraq kórermender tarapynan únemi qoıylatyn «Siz jýrnalıstsiz be?» degen saýal onyń qytyǵyna tıip, sońynda aqyryndap óz qazanynda qaınaýǵa bel býǵandyǵyn aıtady.

Kórermender súıikti ártisterinen halyqtyń yqylasyna bólenýdiń qupııasy, ár róldiń bolmysyn ashýdyń syryn da suraýdy umyt qaldyrmady.

«Shynaıy mahabattan ǵana uly dúnıeler týady. ıAǵnı, akter ózine berilgen kez kelgen rólge ǵashyq bolý kerek. Mysaly, bozbala retinde qyzǵa ǵashyq bolsańyz, esten shyǵarmaýǵa tyrysasyz ǵoı, róldi de solaı súıý kerek. Sonda ǵana ony aldymen óziń ashyp, keıin kórermenge jetkize alasyń. Ár rólime ǵashyq bolyp, ony shegine jetkize oınaý arqyly kórermenniń ystyq yqylasyna ıe boldym dep esepteımin», - dep aǵynan jaryldy akter.

Sonymen qatar adal eńbek adamdy alǵa jeteleıtinin eskersek, Azamat únemi izdenistiń ústinde júretindigin aıtady. Berilgen róldi tek mátinin oqyp jetkizýge bolatynyn, biraq odan eshqandaı jandy obraz shyqpaıtyndyǵyn, sol úshin ár róline jan-jaqty daıyndalatyndyǵyn tilge tıek etti.