Azamat Oınazarov Qazaqstandyq MJS ortalyǵynyń tóraǵasy bolyp taǵaıyndaldy

ASTANA. 8 qańtar. QazAqparat - Azamat Oınazarov «Qazaqstandyq memlekettik-jekemenshik seriktestik ortalyǵy» AQ Basqarma Tóraǵasy bolyp taǵaıyndaldy. Bul týraly QR EBJM baspasóz qyzmetinen habarlandy.

Buǵan deıin ol Qazaqstan Respýblıkasy Qorǵanys mınıstriniń ekonomıka jáne qarjy jónindegi orynbasary qyzmetin atqardy.

Azamat Rysqululy Oınazarov 1970 jyly 24 naýryzda dúnıege keldi. 1992 jyly Novosibir memlekettik ýnıversıtetin, al 2000 jyly Qazaq memlekettik zań akademııasyn támamdady. Qazaq, orys, aǵylshyn tilderin erkin meńgergen.

Eńbek jolyn 1992 jyly QR Ekonomıka mınıstrligine baǵynysty ekonomıka jáne naryqtyq qatynastar ǴZI-de kishi ǵylymı qyzmetker bolyp bastady.

1994 jyly Qazaqstan Respýblıkasy Ekonomıka mınıstrligine qarasty ǴZI-de bas maman bolyp qyzmet etti; 1996 jyly «Almaty saýda-qarjy banki» JAQ-ta jetekshi mamany laýazymyna taǵaıyndaldy; 1997 jyly «Tsesnabank» AQ Basqarma tóraǵasynyń orynbasary qyzmetinde boldy; 1999 jyly Qazaqstan Respýblıkasynyń Premer-mınıstri Keńsesiniń bólim meńgerýshisi; 2001 jyly QR Tabıǵı monopolııalardy retteý, básekelestikti qorǵaý jáne shaǵyn bıznesti qoldaý jónindegi agenttigi tóraǵasynyń orynbasary qyzmetin atqardy.

2003-2006 jyldary QR Qarjy vıtse-mınıstri, 2007 jyly QR Qorǵanys mınıstriniń ekonomıka jáne qarjy jónindegi orynbasary bolyp taǵaıyndaldy.

2010 jyldan bastap, Pavlodar qalasyndaǵy «TASK Holdıng» JShS qarjy dırektory, keıin Dırektorlar Keńesi tóraǵasynyń Keńesshisi bolyp qyzmet etti. Tehnıka ǵylymdarynyń kandıdaty.