Azamat Ómirtaev: qosymsha ýchaskelerdi ashý - halyqtyń medqyzmet túrlerin kezeksiz paıdalanýyna múmkindik
Qaraǵandy oblysynda kompıýterlik tomografııa, magnıttik-rezonanstyq tomografııa syndy qymbat medıtsınalyq qyzmet túrlerin paıdalanǵandardyń sany artty. Mindetti áleýmettik medıtsınalyq saqtandyrý júıesi engizilgenge deıin mundaı qyzmet aıyna tek 1300 ge jýyq adamǵa kórsetiletin. Qazir olardyń sany úsh esege ósip, endi 4000-daı adamǵa qoljetimdi boldy. Sonymen qatar, jobanyń arqasynda jekemenshik áriptestik baǵdarlamasy boıynsha 5 emhana ashylyp, 8 ońaltý ortalyǵy qoldanysqa berildi.
Esterińizge sala keteıik, Qaraǵandy oblysynda medıtsınalyq saqtandyrý júıesi 2019 jylǵy 1 qyrkúıekte iske qosylǵan bolatyn. Kenshiler aımaǵy bul jobany pılottyq rejimde bastady. Oblystaǵy eńbek etetin 395 myń azamat júz paıyz mindetti áleýmettik medıtsınalyq saqtandyrý júıesine engizildi. Al 15 sanatqa kiretin 830 myń turǵynǵa memleket mindetti áleýmettik medıtsınalyq saqtandyrý júıesi aıasynda tegin qyzmet kórsetedi. Sonymen qatar qazir aımaqta 90 myńnan astam ózin ózi jumyspen qamtýshy azamat bar. Ózin ózi jumyspen qamtıtyn azamattarǵa arnalǵan tólem termınaldary qarastyrylǵan. 2020 jyly Qaraǵandy oblysynda densaýlyq saqtaý salasyna 93 mlrd teńgeden astam qarajat jumsalady. Bul ótken jylmen salystyrǵanda, 24 protsentke artyq. Onyń úshten bir bóligi mindetti medıtsınalyq saqtandyrýǵa baǵyttalǵan.
«Mindetti áleýmettik medıtsınalyq saqtandyrý júıesi qarajatty ulǵaıtyp, qosymsha medıtsınalyq qyzmet kórsetetin ýchaskelerdi ashýǵa múmkindik berip otyr. Bizdiń basty maqsatymyz medıtsınalyq mekemelerdegi úlken kezekterdi azaıtý. Ár ýchaskege 1500 adamnan ǵana tirkesek, halyq medıtsınalyq qyzmet túrlerin kezeksiz paıdalana alady. Osylaısha sapaly medıtsınalyq qyzmetti qoljetimdi etemiz», - dep málimdedi QR Densaýlyq saqtaý mınıstrligi MÁMS departamentiniń dırektory Azamat Ómirtaev.
