Azamat Muhamedchınov: Shyǵys Qazaqstanda otyz jylda 144 mektep salyndy

ÓSKEMEN. QazAqparat – Shyǵys Qazaqstan oblysy ákiminiń orynbasary Azamat Muhamedchınovtiń aıtýynsha, sońǵy 30 jylda óńir boıynsha 144 mektep boı kótergen, dep habarlaıdy QazAqparat tilshisi.

«Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústel barysynda óńir ákiminiń orynbasary 30 jyldaǵy negizgi jetistikterge toqtaldy.

«Bul dóńgelek ústeldiń maqsaty - aımaqtyń áleýmettik-ekonomıkalyq jáne qoǵamdyq jetistikterine nazar aýdaryp, Táýelsizdik jyldaryndaǵy memlekettik jobalardyń qorytyndylaryn talqylaý. «Qýatty óńirler – qýatty el» urany Qazaqstannyń aýmaqtyq damýynyń negizgi qaǵıdaty. Shyǵys Qazaqstannyń ındýstrııalyq-agrarlyq jáne ǵylymı-tehnıkalyq áleýeti óńirdiń damý baǵyttaryn aıqyndap berdi. 30 jyl ishinde ónerkásip ónimderin óndirý kólemi 2,4 trln teńgege artty. 2010 jyldan bastap Indýstrııalandyrý kartasy sheńberinde 9 myń jańa jumys orny qurylyp, 768,9 mlrd teńgege 55 joba iske asyryldy», - dedi Azamat Muhamedchınov.

Onyń aıtýynsha, búginde ShQO ınnovatsııalyq ónim kólemi boıynsha respýblıkada 5-shi orynda.

«Elimiz táýelsizdik alǵaly beri oblysta aýyl sharýashylyǵyna quıylǵan ınvestıtsııa kólemi 75 esege artyp, 36,9 mlrd teńgege jetken. 30 jylda 144 mektep, 27 balabaqsha, 453 sport nysany salyndy. Jarma, Abaı, Shemonaıha, Borodýlıha, Ulan aýdandaryndaǵy aýyldar sapaly aýyzsýmen qamtamasyz etildi. Halyqtyń áleýmettik osal toptaryn turǵyn úımen qamtamasyz etý maqsatynda Semeı, Óskemen qalalarynda jáne Kókpekti, Kúrshim, Katonqaraǵaı, Zaısan aýdandarynda 400-den astam páter berildi», - dedi oblys ákiminiń orynbasary.