Azamat Kústibaev: Utylyp jatsam da, jeńiske jeterime sendim
ASTANA. QazAqparat - Grek-rım kúresinen Qazaqstan spartakıadasynyń jeńimpazdary Maqsat Erejepov men Azamat Kústibaev fınaldyq beldesýden keıingi áserlerimen bólisti, dep habarlaıdy Olympic.kz.
Olar el birinshiligine osal qarsylas kelmegenin aıtady.
«Aqtyq syndaǵy kezdesý men úshin aýyr ótti. Biraq men bul týrnırge tek jeńis úshin keldim. Barlyǵyna daıyn boldym. Fınalda qarsylasymnan utylyp jatsam da, jeńiske jeterime sendim. Beldesýdiń aıaqtalýyna eki mınýt qalǵanda qarsy shabýyl jasaýyn kútip, sol sátte ádiske saldym. Maǵan júgiretinin bildim dese de bolady. Hýseın Mýtsolgovpen ómirde dospyz, birge jattyǵý jasap, birge daıyndalamyz. Al kilemde qarsylas ekenimiz anyq. Bıyl balýandar úshin maýsym óte tartysty ótpek. Maqsatym - elimizde ótetin álem chempıonatyna qatysyp, Olımpıada oıyndaryna lıtsenzııa jeńip alý», - deıdi Azamat Kústibaev.
Azamat Kústibaev 87 kelide el chempıony atandy. Fınalda ol qaraǵandylyq Hýseın Mýtsolgovtan aılasyn asyrǵan edi.
82 kelidegi Maqsat Erejepov te álem chempıonatynda baq synap, elimizge kópten kútken altyn medaldi syılaýdy armandaıdy.
«El spartakıadasyna jeńiske jetsem degen oı ǵana boldy. Balýan úshin basqa qandaı maqsat bolýy múmkin? Fınaldyq kezdesý men oılaǵandaı ońaı bolǵan joq. Qıyn soqty. Qarsylasym jaqsy daıyndyqpen kelgen. Ony merziminen buryn jeńemin dep oılaǵam. Biraq bul oıym júzege aspady. Tipti, beldesý barysynda oǵan eki upaı syılap jiberdim. Aıqyn basymdyqpen utatynyma senimdi bolǵan em. Degenmen, eń bastysy chempıon atandym. Endigi bar kúshti elimizde ótetin tarıhı álem chempıonatyna daıyndalýǵa salamyn», - deıdi Erejepov.
Maqsat fınaldyq synda qostanaılyq Mıras Barshylyqovty jeńgen bolatyn.
