Azamat Qanapııa: Tyrnaq astynan kir izdemeı, qazaqsha dýblıajǵa qoldaý kórseteıik

«Kinopark 4 Globus» kınoteatrynda uıymdastyrylǵan kórsetilimge 100-den astam bala qatysty. Mýltfılmdi tamashalaǵannan keıin balalarǵa dastarhan jaıylyp, tátti taǵamdar taratyldy.

«Meıirimdilik shýaǵy» atty qaıyrymdylyq baǵdarlamasy bar. Osy baǵdarlama aıasynda biz «Bolashaq» stıpendıattary Almaty kásipkerleriniń qoldaýymen balalar úıiniń tárbıelenýishileri men áleýmettik jaǵdaıy tómen otbasynyń balalary úshin jyl boıy qaıyrymdylyq, mádenı, oıyn-saýyqtyq sharalaryn uıymdastyramyz. Búgin «Aq Úmit», «Dom Nadejdy» balalar úıiniń 100-den asa tárbıelenýshisi boldy», - dedi «Bolashaq» qaýymdastyǵynyń ókili Nursultan Arystanbaev. 

Eske sala keteıik, «Tachkı 3»/«Kólikter 3» - qazaq tiline dýblıaj jasalǵan 20-shy fılm. Gollıvýd fılmderin qazaq tiline dýblıaj jasaý jobasy da osy anımatsııalyq fılmniń «Kólikter 2» túsiriliminen bastalǵan. Osy oraıda, búgingi sátti paıdalanyp, akter jáne dıktor, álemdegi Metr dýblıajynyń úzdik daýysynyń ıegeri Azamat Qanapııamen suhbattastyq (Walt Disney stýdııasynyń dıplomy).

-Azamat, búgingi dýblıaj salasynda qandaı qıyndyqtar kezdesedi?

-Eshqandaı qıyndyq joq. Qazaqsha dýblıajdyń sapasy nashar deıtinder, ol «jeńildiń astymen, aýyrdyń ústimen júretin» adamdardyń sózi ǵoı. Negizinde, qazaq tili - eń baı tilderdiń biri. Mysaly, dýblıaj barysynda bir birine úılestirýge kelgende maǵynasyn joǵaltpaı, tolyqqandy aýdarmasyn berý jaǵynan kelgende qazaq tilinde qıyndyq joq. Bizdiń tilimizdiń baılyǵy osy jerde. Qalǵany akterdiń sheberligine baılanysty. «Meniń keıipkerim  Metrdiń  týǵan jeri Ońtústik Amerıka jáne ol ońtústik aktsentpen sóıleıdi. Sondyqtan, qazaq nusqasynda biz de ońtústik aktsent jasaýdy sheshtik. 

-Qazaq tildi kórermen «qasań aýdarma dýblıaj sapasyn tómendetedi» degen pikir aıtyp qalyp jatady...

-Tyrnaq astynan kir izdegendi qoıyp, qoldaý kórsetý kerek. Qasań, «kalka» aýdarmaǵa men de qarsymyn. Ózi bul salany jetik bilmeı,  dıvanda otyryp alyp, pikir aıtqyshtar odan da kelip osyndaı jobaǵa qoldaý kórsetsin. «Qazaq tili» dep shyryldap júrgenimizge 25 jyl boldy, endi qazaq tilinde sóılep jatqanymyzda kedergi jasamaı kerisinshe, qoldaý kórsetý qajet. Kelip, bala-shaǵasymen, bılet alyp bolsa da qoldaý tanytsa deımiz. Armanym  shet eldiń kassalyq fılmderi men mýltfılmderin osylaı qazaqshalap otyrý. Buǵan memleket tarapynan qoldaý joq. Joq dep qarap otyra bermeı, óz azamattyq boryshymyz retinde, elimizdiń bolashaǵy úshin atsalysqymyz keledi. Meniń jeke stýdııam bar, tipti bolmasa sonymen de óz úlesimdi qosqym keledi.    

-Tyńnan túren salyp, «Gollıvýd» fılmderin qazaqsha sóıletýdi bastadyńyzdar, qandaı qyzyqty jaǵdaılar boldy?

-Dýblıaj jasaǵanda men qoryqpadym. Men negizi, «Kólikter 2» mýltfılmin dýblıajdaǵanda basynda agenttiń rólin dybystaýǵa shaqyrylǵanmyn. Biraq, rejısser Metrdiń daýsyn salyp kórýdi usyndy. Qarasam, Metrdiń tisi aqsıyp turady eken. Sosyn aıttym, mynadaı tisi bar adamnyń tiliniń múkisi bolady, «s» árpin saqaý sóıleýi kerek qoı dep, ózimiz sheshim qabyldap, saqaý sóıletip shyqtyq. Kıno avtorlaryna bul sheshimimiz unady. Gollıvýdqa jiberdik, olar qabyldady. Sosyn, «ne zat?», «ólá» degen sekildi dılektilerdi qoldandyq. Ádemi shyqty. Dýblıajǵa barlyǵy 30-dan asa akter qatysty. Mátinniń aýdarmashysy  Nurdáýlet Zatılla.

-Azamat, suhbat bergenińizge rahmet, iske sáttilik tileımiz.